Օնլայն խաղատան վերահսկողությունը կօգնի փողերի լվացման դեմ պայքարում: Այս մասին սեպտեմբերի 27-ին խորհրդարանում հայտարարել է ֆինանսների փոխնախարար Պավել Սաֆարյանը՝ երկրորդ եւ վերջնական ընթերցմամբ ներկայացնելով «Շահումով խաղերի եւ խաղատների մասին» օրենքում փոփոխությունների օրինագիծը:
Օրինագծի համաձայն՝ շահույթով համացանցային խաղերը կարտոնագրվեն այն նույն բարդությամբ, ինչ սովորական խաղատները: «Վերահսկողության բացակայությունը փողերի լվացման վտանգ է ստեղծել՝ հատկապես հաշվի առնելով, որ խաղատան կազմակերպիչը կարող է չճանաչել իր իրական խաղացողներին: Կատարվող փոփոխություններով նախատեսվում է այդ բացը վերացնել»,- հավելել է Սաֆարյանը:
Առաջարկվում է, որ օրենքն ուժի մեջ մտնի 2017 թվականի հունիսի 1-ին, որպեսզի այդ ընթացքում բիզնեսը հարմարվի նոր՝ ավելի խիստ պայմաններին: