Եվրամիությունը կասեցրել է «Կոլումբիայի հեղափոխական ուժեր»՝ FARC խմբավորման դեմ պատժամիջոցները, հայտնում է DW-ն՝ վկայակոչելով ԵՄ խորհրդի մամուլի ծառայությունը: Այս որոշումը պայմանավորված է Կոլումբիայի նախագահ Խուան Մանուել Սանտոսի եւ FARC-ի միջեւ խաղաղության համաձայնագրով, որը ստորագրվել էր նախօրեին:
FARC-ը 2002-ից ԵՄ-ում համարվում էր ահաբեկչական կազմակերպություն:
Կոլումբիան եւ FARC-ը համաձայնության են եկել մոտ 3 տարի տեւած բանակցությունների արդյունքում: Կողմերի միջեւ համաձայնագիրը վերջ է դնելու քաղաքացիական պատերազմին, որը սկսվել էր ավելի քան 50 տարի առաջ: Համաձայանգիրը պետք է հավանություն ստանա հոկտեմբերի 2-ին կայանալիք հանրաքվեում: Եթե դա տեղի ունենա, FARC-ի զինյալները զենքը պետք է վայր դնեն 2 ամսվա ընթացքում: