Հայաստանի հանքավայրերը կառավարող ընկերությունները պետք է ինքնուրույն օգտակար նյութեր քաղեն մշակվող հանքանյութից: Այդ մասին հայտնել է Հայաստանի էներգետիկայի եւ բնական պաշարների փոխնախարար Վարդան Գեւորգյանը` ներկայացնելով բնական պաշարների մասին օրենսգրքում փոփոխությունների նախագիծը:
Նախագծի համաձայն, պոչամբարներն այլեւս տեխնոգեն հանքավայր չեն համարվի: Այլ խոսքով, ընկերությունը չի կարողանա պոչեր թողնել, որպեսզի ուրիշ մեկը մշակի դրանք: Ընկերություններն իրենք պետք է կրկնակի լվանան հանքանյութը, մետաղներ կորզեն եւ դրանց դիմաց ռոյալթի վճարեն, ճիշտ ինչպես առաջնային արդյունահանման դեպքում:
Իսկ երկրաբանական հետախուզման արտոնագրի հայտի կամ հանքանյութի արդյունահանման համար անհրաժեշտ կլինի ներկայացնել թափոնների վերամշակման պլան եւ այդ աշխատանքների ֆինանսական երաշխիքներ:
Նոր պահանջները տարածվում են նաեւ գործող հանքավայրերի վրա. նրանց նախապատրաստության համար 5 տարի կտան:
