«Հրապարակ» թերթը գրում է. «Նախկին վարչապետ Հովիկ Աբրահամյանը պաշտոնանկությունից հետո մեկուսացել է: Տեղեկություններ կան, որ օրերս նա մերժել է «Տաշիր գրուպի» սեփականատեր եղբայրներ Սամվել եւ Կարեն Կարապետյանների հանդիպման առաջարկը՝ ասելով, որ իրենց պատճառով է ինքը պաշտոնանկ եղել։ Նա թեպետ Հայաստանում էր, բայց չմասնակցեց ՀՀԿ ԳՄ վերջին նիստին։
Ի դեպ, Աբրահամյանը ցանկացել է, որ պաշտոնանկությունը լինի անկախության 25-ամյակից հետո։ Հոր նկատմամբ վերաբերմունքն ազդել է նաեւ քաղաքապետ որդու վրա։ Լուրեր ենք ստանում, որ Արտաշատի քաղաքապետ Արգամ Աբրահամյանը վերջին օրերին նախկինի պես ցուցադրաբար չի զբոսնում քաղաքի փողոցներում, եկեղեցու բակում։ Արտաշատցիները կատակում են, թե Աբրահամյանի պաշտոնանկությունից հետո քաղաքում կյանքը կարծես կանգ է առել։ Մինչեւ անգամ խոսվում է Արգամ Աբրահամյանի հրաժարականի մասին։
Գրեթե վճռված հարց է, որ Հովիկ Աբրահամյանը 2017-ի ԱԺ ընտրությունների նախընտրական շտաբը չի ղեկավարի։ Ոմանք Արգամիչին տեսնում են ԱԺ նախագահի պաշտոնում, որին հասնելու համար պետք է նախ պատգամավոր դառնալ։ Սակայն Սերժ Սարգսյանի վերաբերմունքը հուսադրող չէ, առաջիկայում նա պաշտոնանկ կանի նաեւ նախկին վարչապետի մեկենասությամբ Արարատի մարզպետ դարձած Ռուբիկ Աբրահամյանին։ Երեկ մարզի, ավելի կոնկրետ՝ Արտաշատի համայնքապետերի շրջանում արդեն չհայտարարված սուգ էր, ահուդողով սպասում էին Արամայիս Գրիգորյանի վերադարձին, որն Արգամիչի «մարդկանց» դժվար թե պահի։ Թեպետ մարզպետի պաշտոնն արարատցի օլիգարխի սրտով չէ, որովհետեւ նախարար դառնալու վրա նա մեծ ռեսուրսներ է վատնել։
Առավել մանրամասն՝ թերթի այսօրվա համարում
