ԱՄՆ նախագահի դեմոկրատ թեկնածու Հիլարի Քլինթոնի նախընտրական շտաբի հաշվարկով նրա մրցակից հանրապետական Դոնալդ Թրամփը բանավեճի ժամանակ 58 անգամ ստել է, այս մասին հայտնում է Քլինթոնի կայքը:
«90 րոպե տեւած բանավեճի ընթացքում, որից մոտ 46 րոպեն Թրամփն է խոսել, նրան հաջողվել է ստել 58 անգամ, աղավաղված ու երեւակայական փաստերը ներկայացնելով որպես պատասխաններ»- նշված է հաղորդագրության մեջ:
Առաջին կետով նշված է, որ Թրամփը ստում էր, երբ հերքում էր, որ գովերգում է Ռուսաստանի նախագահ Վլադիմիր Պուտինին: Բացի դրանից Քլինթոնի շտաբի կարծիքով հանրապետականը անազնիվ էր, երբ խոսում էր Դեմոկրատական կուսակցության համակարգիչների արգելաբացմանը ռուս հաքերների մասնակցության ապացույցների բացակայության մասին:
Թրամփը նաեւ ստել է Իրաքում պատերազմին իր վերաբերմունքի հարցում ու զրպարտել է Քլինթոնին ու ԱՄՆ նախագահ Բարաք Օբամային՝ նրանց վրա բարդելով ԻՊ խմբավորման ստեղծման պատասխանատվությունը:
Ըստ Քլինթոնի շտաբի՝ Թրամփի մյուս ստերից է այն, որ Վաշինգթոնը մեկ միլիար դոլար է վճարել Իրանի հետ միջուկային գործարքի շրջանակում, որ իրեն սատարում են աֆրոամերիկացի ընտրողները, որ չկան ապացույցներ որ Օբաման հենց ԱՄՆ-ում է ծնվել, նաեւ որ «Բ 52» ռազմավարական ռմբակոծիչները հնացած են:
Սեպտեմբերի 26-ին Հոֆստի համալսարանում անցել է Թրամփի ու Քլինթոնի նախընտրական բանավեճերի առաջին փուլը: Այն դիտել է 84 մլն մարդ, ինչը ռեկորդային ցուցանիշ է:
CNN հեռուստաալիքի տվյալներով հանդիսատեսի 62 տոկոսը իր նախապատվությունը տվել է Դեմոկրատական կուսակցությունից առաջադրված թեկնածու Քլինթոնին, իսկ հանրապետականը ստացել է միայն 27 տոկոսի աջակցությունը: