«Սասնա ծռեր» խմբի անդամ Արմեն Լամբարյանը սեպտեմբերի 27-ին Երեւանի «Էրեբունի» հիվանդանոցում ենթարկվել է ոտքի վիրահատության: NEWS.am-ի հետ զրույցում «Էրեբունի» հիվանդանոցի տնօրեն Միքայել Մանուկյանը նշեց, որ վիրահատվել է Արմեն Լամբարյանի ոտքը:
«Ձախ ոտքի ազդրի կոտրվածքի պատճառով տեղադրվել է մետաղական հարթակ «օստեոսինթեզ»: Վիրահատությունը հաջող է անցել, այժմ նա Վերակենդանացման բաժանմունքում է, վիճակը լավ է»,- ասաց Միքայել Մանուկյանը:
Նա նշեց, որ Արմեն Լամբարյանը դեռ մեկ շաբաթ կմնա հիվանդանոցում:
Ավելի վաղ տեղեկացրել էինք, որ «Սասնա ծռեր» խմբի անդամ Արմեն Լամբարյանը սեպտեմբերի 26-ին «Դատապարտյալների հիվանդանոց» ՔԿՀ-ից տեղափոխվել է Երեւանի «Էրեբունի» հիվանդանոց:
Արմեն Լամբարյանին մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) եւ 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը):