Հարկային օրենսգրքի նոր խմբագրության մեջ եկամտահարկն ավելի ցածր կլինի: Այդ մասին սեպտեմբերի 28-ին խորհրդարանում հայտնել է Հայաստանի Պետեկամուտների կոմիտեի փոխնախագահ Վախթանգ Միրումյանը` ներկայացնելով Հարկային օրենսգրքի նախագիծը` 2-րդ ընթերցմամբ:
Այժմ ամսական մինչեւ 120 հազար դրամ աշխատավարձ ստացող անձինք 24,4 տոկոս հարկ են վճարում, մինչեւ 2 մլն ստացողները` 26 տոկոս, 2 մլն-ից ավելի` 36 տոկոս: ՀՕ-ի նախագծի 1-ին ընթերցման ընթացքում առաջարկել են հարկի տոկոսադրույքն իջեցնել մինչեւ 23 տոկոս (24,4 տոկոսի փոխարեն): Բայց եթե նախկինում այդ 23 տոկոսն առաջարկում էին նրանց համար, ով ամսական մինչեւ 120 հազար դրամ է ստանում, ապա այժմ` մինչեւ 150 հազար ստացողների համար: Այլ խոսքով, նրանք, ովքեր բյուջետային ոլորտում միջինին մոտ աշխատավարձ են ստանում (ամսական 120 – 150 հազար) կվճարեն 23 տոկոս:
Նախագծի 1-ին ընթերցման մեջ 120 հազարից մինչեւ 1 մլն աշխատավարձն առաջարկել են հարկել 28 տոկոս հարկով: Այժմ առաջարկվում է այդ 28 տոկոսի տակ ավելի լայն ընդգրկում մտցնել` 150 հազարից մինչեւ 2 մլն: 1 մլն եւ ավելի աշխատավարձի դեպքում առաջարկվում է ամենաբարձր հարկը` 33 տոկոս: Այժմ որպես ամենաբարձր հարկ առաջարկվում է թողնել 36 տոկոսը, բայց արդեն 2 մլն-ից բարձր աշխատավարձի դեպքում:
Այսպիսով` արդյունավետ (այսինքն միջին հաշվեկշռված – խմբ.) տոկոսադրույքը մի քիչ կկրճատվի` 25,3 տոկոսից մինչեւ 24,9 տոկոս: Իսկ ընդհանուր առմամբ ավելի քիչ հարկ կվճարեն բոլոր նրանք, ովքեր ամիսը մինչեւ 280 հազար դրամ աշխատավարձ են ստանում (մոտ 590 դոլար, խմբ.), իսկ դա երկրում վարձու աշխատողների մոտ 90 տոկոսն է (89,8 տոկոս), կամ 550 հազար մարդ:
«Ավելի բարձր աշխատավարձի դեպքում դրույքը բարձրանում է, բայց ոչ այնքան, որքան առաջարկվում էր 1-ին ընթերցման դեպքում: Այն ժամանակ առաջարկվում էր 4,3 տոկոսով բարձրացում, այժմ` առավելագույնը 1,72-ով եւ դա էլ` նրանց համար, ովքեր 2 մլն դրամ եւ ավելի աշխատավարձ են ստանում», - պարզաբանել է Միրումյանը:
Նշենք, որ հարկային տոկոսադրույքներում պահպանվել է նախկին աստիճանային սկզբունքը (այսինքն հետագա դրույքը կիրառվում է եկամտի գերազանցող մասի նկատմամբ): Օրինակ` 200 հազար աշխատավարձի դեպքում առաջին 150 հազարը կհարկվի 23 տոկոս հարկով, իսկ մնացած 50 հազարը` 28 տոկոս):
