«Հայաստանի էլեկտրական ցանցեր» ՓԲ ընկերությունում, վերջին մեկ տարվա ընթացքում, երբ աշխատում է նոր թիմը, հիմնական խնդիրը չարաշահումների վերացումն ու ներդրումներն են: Այս մասին, այսօր՝ սեպտեմբերի 28-ին, «Տաշիր» առեւտրի կենտրոնի տարածքում ՀԷՑ-ի նոր սպասարկման կենտրոնի բացման ժամանակ նշել է «Տաշիր գրուպ» ընկերության ներկայացուցիչ Նարեկ Կարապետյանը՝ հավելելով, որ վերջին տարում ընկերության պարտքն ու կորուստները շեշտակի նվազել են:
«Նախ մենք նոր ներդրումներ ենք իրականացնում՝ հնամաշ համակարգը վերազինելու համար, որի շնորհիվ կորուստները կրճատվում են: Երկրորդ խնդիրը տեղերում կատարվող չարաշահումներն են, որը համակարգի միջոցով կառավարելը դժվար է: Մենք պետք է ունենանք նաեւ հետադարձ կապ հոսանք սպառողների հետ, որի միջոցով կկարողանանք տեղեկատվություն ստանալ չարաշահումների եւ այլ խնդիրների մասին: Հետո պետք է գնալ այդ չարաշահումների հետեւից ու լուծել խնդիրները: Միայն այդ դեպքում՝ կկարողանանք ունենալ բավականին թափանցիկ ու արդյունավետ գործող էներգետիկ ընկերություն»,-ասաց նա:
