Առաջիկա 10 օրերի ընթացքում տեղի կունենա «Հայաստանի էլեկտրական ցանցեր» ՓԲ ընկերության վճարումների նոր, առցանց համակարգի շնորհանդեսը: Այս մասին, այսօր՝ սեպտեմբերի 28-ին, «Տաշիր» առեւտրի կենտրոնի տարածքում ՀԷՑ-ի նոր սպասարկման կենտրոնի բացման ժամանակ նշեց «Հայաստանի էլեկտրական ցանցեր» ՓԲԸ գլխավոր տնօրեն Կարեն Հարությունյանը:
Նրա խոսքով, այդ համակարգը թույլ կտա, որպեսզի Հայաստանի առայժմ քաղաքներում եւ առայժմ միայն «Հայփոստի» եւ «Արդշինբանկի» գրասենյակների համագործակցության շրջանակներում, ցանկացած բաժանորդի սմարթֆոնի վրա երեւա եւ էլեկտրաէներգիայի պարտքը, եւ առցանց վճարումը. «Այսինքն առավելագույնս կկիրառենք տեխնիկական նվաճումները»:
Նշենք, որ այսօր՝ սեպտեմբերի 28-ին, «Տաշիր» առեւտրի կենտրոնում բացվել է ՀԷՑ-ի նոր սպասարկման կենտրոնը: «Տաշիր» առեւտրի կենտրոնում բացված սպասարկման կենտրոնն աշխատելու է ժամը 10.00-ից 20.00-ն: Այն թվով երկրորդն է, առաջինը օրեր առաջ բացվել է «Տաշիր Սթրիթ» առեւտրի կենտրոնի տարածքում: Ընդհանուր առմամբ, Երեւանում կբացվեն 7 նմանատիպ կենտրոններ:
