Հայաստանի իշխանությունները պարզեցված հարկը թողնում են միայն ամենամանր կրպակների համար: Այս մասին սեպտեմբերի 28-ին խորհրդարանում հայտարարել է ընդդիմադիր պատգամավոր Խաչատուր Քոքոբելյանը՝ ելույթ ունենալով Հարկային օրենսգրքի օրինագծի երկրորդ ընթերցմամբ քննարկմանը:
Նրա համոզմամբ՝ բիզնեսի համար շրջանառության հարկի շեմը (որից ավելի բարձր են ԱԱՀ վճարում) չի կարելի ներկայիս 115 մլն դրամից իջեցնել մինչեւ նախկին 58,35 մլն դրամը, ինչպես կառավարությունն է առաջարկում: Դրանում ոչ մի կասկած չի մնա, եթե պարզենք 60 մլն դրամ տարեկան շրջանառության դեպքում օական շահույթը:
«Պարզ լինելու համար վերցնենք նույնիսկ ոչ թե 58,35, այլ 60 մլն: Դա օրական 165-170 հազար դրամ է: Բայց ոչ թե շահույթ, այլ շրջանառություն: Այստեղից հանեք հարկերը, կոմունալ վճարումները, գուցե նաեւ՝ 1-2 աշխատակցի աշխատավարձը: Ի՞նչ է մնում: Ասում եք՝ պարզ ռեժիմ փոքր բիզնեսի համար, բայց ստացվում է՝ նույնիսկ փոքրիկ խանութնորը դրանից չեն կարողանա օգտվել: Միայն ամենափոքր կրպակները՝ 5 քառակուսի մետր տարածքով»,- ասել է Քոքոբելյանը: