Իմ հանդեպ կա ձեռառնոցի ու, շատ կներեք, հազար ներողություն՝ ցինիզմ: Այս մասին, այսօր՝ սեպտեմբերի 28-ին, ԱԺ-ում Հարկային նոր օրենսգրքի քննարկումների ժամանակ նշեց ՀԱԿ խմբակցության պատգամավոր Հրանտ Բագրատյանը՝ դիմելով ՀՀ պետեկամուտների կոմիտեի նախագահի տեղակալ Վախթանգ Միրումյանին:
«Դժգոհ եմ փոփոխություններից եւ նաեւ ձեր պատասխաններից, որովհետեւ ձեր պատասխանների մեջ, ոնց ասեմ, իմ հանդեպ կա ձեռառնոցի ու, շատ կներեք, հազար ներողություն՝ ցինիզմ»,- հայտարարեց Բագրատյանը՝ կետ առ կետ ներկայացնելով իր առարկությունները:
Նրա խոսքով, անընդունելի է, որ սահմանի վրա ավելացված արժեքի հարկի գանձման պրակտիկան շարունակվում է կիրառվել, որի դեպքում՝ ԱԱՀ-ն դառնում է շրջանառության հարկ: «Ես ձեզ լրջագույն հարց եմ բարձրացնում՝ բացառել սահմանի վրա ԱԱՀ-ն, ինչը եղել է հայոց պետության մեջ մինչեւ 1996-ը:
Ես ձեզ ասում եմ՝ ինչպես կարող է անհատ ձեռնարկատերը ԱԱՀ վճարող լինել: Դուք պատասխանում եք՝ օրենսդրությամբ սահմանված կարգով կարող է: Հասկանո՞ւմ եք՝ անհատ ձեռներեց է, եւ չի կարող թեկուզ նրա համար, որ չի կարող հաշվապահություն պահել»,-ընդգծեց Բագրատյանը:
Նա հիշեցրեց, որ առաջարկել էր բացառել շահութահարկի կանխավճարի ինստիտուտը. «Ասում եք միջազգային պրակտիկայում տարածված է։ Ես էլ Ձեզ ասում եմ՝ միջազգային պրակտիկայում էլ ավելի տարածված է կանխավճար չտալը:
Ձեզ ասում են անշարժ գույքի հարկ պիտի տա ինչպես քաղաքացին, այնպես էլ պետական հիմնարկը, ասում եք՝ բյուջեում միջոցներ չկան: Բյուջեի միջոցներն ինչ կապ ունեն: Ես լրջագույնս առաջարկ եմ անում, դուք թեթեւ ձեւով ցրում եք»:
Բագրատյանը բարձրացրեց նաեւ հարկման մեխանիզմի խնդիրը. «Ինչո՞ւ մարդը 20 մլրդ վաստակելու դեպքում պետությանը պետք է տա 20 տոկոս շահութահարկ, 40 մլրդի դեպքում ՝ 5 տոկոս, իսկ 50 մլրդի դեպքում՝ 2 տոկոս: Բա ո՞ւր են մնում մեր՝ փոքր բիզնեսը խրախուսելու խոստումները»:
Ի պատասխան Վախթանգ Միրումյանը նշեց, որ հարկման նման մեխանիզմի հիմքում կան պետության կողմից ակնկալվող տնտեսական ակնկալիքներ. «Կան համապատասխան մեխանիզմներ, կրկնակի հարկումը բացառող համաձայնագրեր, եւ առկա տնտեսական պայմաններում, իհարկե, պետք է օգտվենք ստեղծված այդ հնարավորություններից: Այս մեխանիզմը նրա համար է, որ գրավիչ դարձնի մեր երկիրը, որ գործարքները իրականացվեն Հայաստանով, որը միայն օգուտ է Հայաստանի համար: Մտավախություն կար, որ մոնոպոլիաներ, անհավասար մրցակցային դաշտ կձեւավորվեն, արտահանումը կենտրոնանալու է որոշ անձանց ձեռքում, բայց պրակտիկան ցույց տվեց, որ իրավավիճակը այլ է, եւ որեւէ մոնոպոլիա չի ձեւավորվել։ Ավելին՝ պետբյուջեն շահում է»:
Ինչ վերաբերում է նրան, որ անհատ ձեռներցը եւս հարկվում է ավելացված արժեքի հարկով, Միրումյանն ընդգծեց. ««Ի՞նչն է խանգարում, որ անհատ ձեռնարկատերը ունենա հարյուր աշխատող: Կարգավիճակի հետ կապ չունի, աշխատողներ ունենալն արգելված չէ»:
Իսկ այն, որ Բագրատյանն առաջարկում է ընդհանրապես սահմանին վերացնել հարկի գանձումը, իրենք դա ընկալել են որպես մտահոգություն եւ ոչ թե առաջարկություն:
