Հռոմի Ֆրանցիսկոս Պապը չորեքշաբթի անհանգստություն է հայտնել սիրիական Հալեպում իրավիճակի հետ կապված եւ հերթական անգամ բոլոր ուժերին կոչ է արել պաշտպանել այդ քաղաքի քաղաքացիական բնակչությանը, հայտնում է «ՌԻԱ Նովոստին»:
«Ես դարձյալ իմ մտքերն ուղղում եմ սիրելի եւ հոշոտված Սիրիային: Ես շարունակում եմ դրամատիկ լուրեր ստանալ Հալեպի բնակչության ճակատագրի մասին, որի տառապանքները ես իմն եմ համարում», — ասել է քահանայապետը Վատիկանում Սուրբ Պետրոսի հրապարակում ընդունելության ընթացքում:
Ֆրանցիսկոսը «խորը ցավ եւ անհանգստություն» է հայտնել այն կապակցությամբ, ինչ տեղի է ունենում սիրիական այդ քաղաքում, որտեղ «մահանում են հիվանդ երեխաներ, երիտասարդ մարդիկ եւ տարեցներ»:
«Ես դարձյալ դիմում եմ բոլոր կողմերին` ամբողջ ուժով պաշտպանել քաղաքացիական բնակչությանը: Եվ ես դիմում եմ նրանց խղճին, ով պատասխանատվություն է կրում ռմբակոծումների համար եւ ով պետք է Աստծո առաջ պատասխան տա դրա համար», — եզրափակել է Հռոմի Պապը: