ՀՀ գյուղատնտեսության նախարար Իգնատի Առաքելյանը խաղողի բերքը մթերած եւ մինչեւ այժմ գումարը չստացած խաղողագործներին առաջարկում է մինի արտադրություններ հիմնել:
«Գտնենք ներդրող, որը տեխնոլոգիաներով գինի արտադրել կսովորեցնի ձեզ, դուք կաշխատեք, կշշալցնեք: Ես կարող եմ գնալ, պայքարել, բերել ծրագիր, որ մինի արտադրությունն ձեւավորվի, մրցեք խոշորների հետ: Ապաացուցեք, որ ձեր գինին լավն ա, բայց դուք պատրա՞ստ եք: Կամ կարաք պայմանագիր լինի համապատասխան արտադրողի հետ, ասեք` մեր խաղողը կվերցնեք կմշակեք, կտաք ինձ գինին, ես ինքս կշշալցնեմ: Դա էլ կարող է լինել: Անգամ թող շշալցնի ձեր անունով, տա: Ի վերջո, ինչքա՞ն կարաք ջերմուկի շշով գինի վաճառեք էս տռասայի վրա»,- այսօր՝ սեպտեմբերի 28-ին, գյուղացիների հետ հանդիպման ժամանակ նշեց նախարարը` առաջարկելով որոշում կայացնել ու իրեն տեղյակ պահել:
Նախարարն ասաց, որ խոսել է խաղողագործներին պարտքեր ունեցող «Վեդի ալկո» ընկերության տնօրեն Մանվել Ղազարյանի հետ, նա ասել է, որ գինին չի վաճառվում պարզապես:
Խաղողագործները նախարարին բողոքեցին, որ «Արենի» տեսակի ավելի շատ գինի է արտադրվում, քան «Արենի» խաղող է մթերվում: Նախարարը խոստացավ վերահսկել այս ոլորտը, ապա առաջարկեց ստեղծել ասոցիացիա, որը կզբաղվի այդ հարցով:
«Մենք կնայենք, թե ինչքան «Արենի» խաղող է մթերվել եւ ինչքան «Արենի» գինի է արտադրվել: Եթե գինին դրվում է խիստ վերահսկողության տակ, դա կարող է լինել հարցի լուծում: Կստուգենք, եթե համոզված եք, որ Արենի գինի արտադրվում է ավելի շատ, քան Վայոց ձորում խաղող է մթերվում: Մեր ուղղությունը լինելու է կարգավորել ուղղությունը, պահպանել հայկական կոնյակ անունը: Չենք թողնելու, որ լցնեն ինչ ուզենան ու վրան գրեն` հայկական կոնյակ, նույնը՝ Արենին»,- ասաց նախարարը:
Հանդիպման ավարտին նախարարը մեկնեց մարզպետարան, որտեղ պետք է հանդիպում կայանա գինի արտադրողների հետ:
«Ես ոչ մեկի չեմ խնդրելու, որ մթերեն, բայց ինչքան օրենսդրական դաշտ կա, պահպանելու ենք: Մենակ խնդրում եմ, ճանապարհ մի փակեք, մենք գիտենք ամեն ինչ, մենք ուզում ենք օգնած լինենք»,- ասաց նա:
Հիշեցնենք, որ սեպտեմբերի 19-ին աղավնաձորցիները փորձել էին փակել Երեւան-Մեղրի միջպետական ճանապարհը, իսկ սեպտեմբերի 15-ին հանդիպել էին Վայոց Ձորի մարզպետ Հարություն Սարգսյանի հետ, որն ասել էր, որ գումարի խնդիրը կլուծվի նոր կառավարության ձեւավորումից հետո:
Մարզպետն ու «Վեդի ալկո» ընկերության տնօրեն Մանվել Ղազարյանը սեպտեմբերի 1-ին աղավնաձորցիներից 15 օր ժամանակ էին խնդրել, որպեսզի գործարանը կարողանա մարել 140 միլիոն դրամի պարտքը: Ընդ որում, 15 օրում խնդիրը լուծելու խոստումը տվել էր անձամբ վարչապետ Հովիկ Աբրահամյանը:
Ավելի վաղ տեղեկացրել էինք, որ 11 ամիս առաջ մթերված խաղողի դիմաց գումարը չստացած աղավնաձորցիները բողոքի ակցիա էին արել. փակել էին դպրոցի մուտքը եւ Գիտելիքի օրը երեխաներին չէին ուղարկել դպրոց:
