Կառավարությունը հանում է սխալ կազմված ապրանքագրերի փոփոխման սահմանափակումներ: Այս մասին սեպտեմբերի 28-ին հայտարարել է ՊԵԿ պետի տեղակալ Վախթանգ Միրումյանը՝ ԱԺ-ում երկրորդ ընթերցմամբ քննարկման ներկայացնելով Հարկային օրենսգրքի օրինագիծը:
Նրա խոսքով՝ եթե նախկինում կարելի էր փոփոխել սխալ կազմված 10-ից ոչ ավել եւ հաշվետու ժամանակաշրջանում շրջանառության 10 տոկոսից ոչ ավելի ընդհանուր գումարով փաստաթղթեր, ապա այժմ սահմանափակումներ չեն լինի: Դրա փոխարեն հարկային ծառայությունը սուբյեկտներին կհետեւի էլեկտրոնային համակարգի միջոցով, քանի որ բոլոր ապրանքագրերը դուրս կգրվեն էլեկտրոնային ճանապարհով: Եթե ձեռնարկատերերը իրենց փաստաթղթերը բավական հաճախ փոփոխեն, նրանք իրենց վրա կհրավիրեն հարկային ծառայության ուշադրությունը: ԱԱՀ-ից ազատված գործարքների հաշիվ-ապրանքագրերի փոփոխությունը եւս նույն կերպ կթույլատրվի:
«Նախկինում, եթե տնտեսվարողը սխալվում էր եւ այդպիսի փաստաթուղթ էր դուրս գրում, նրան մենք պարտադրում էինք ԱԱՀ վճարել, իսկ գործարքի մյուս կողմին արգելում էինք դուրսգրում կատարել: Այժմ ձեռնարկատերերը կարող են ազատ փոփոխել այդ փաստաթղթերը»,- հավելել է Միրումյանը:
