Թե ով է այս կառավարության տերը, շատ հստակ սահմանված է ՀՅԴ-ՀՀԿ համատեղ հայտարարությամբ, հուշագրով։ Այս մասին NEWS.am-ի հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանն՝ անդրադառնալով Էդուարդ Շարմազանովի հայտարարությանը, թե նոր կառավարության քաղաքական տերը ՀՀԿ-ն է:
«Թե ով է այս կառավարության տերը, շատ հստակ սահմանված է մեր համատեղ հայտարարությամբ, հուշագրով, որին դուք ծանոթ եք, մենք պատասխանատվություն ենք կրում այս կառավարության համար եւ մասնակցություն ունենք մեր չափով այս գործունեության մեջ»,-ասաց պատգամավորը։
Նշենք, որ ՀՀԿ խոսնակը նշել էր, որ «բոլոր այն մեր քաղաքացիները, որոնք կարծում են, թե Հայաստանում նոր կառավարությունը հնի շարունակողը չէ, լրիվ նոր կառավարություն է ու սրա քաղաքական պատասխանատուն այլ է, սխալվում են»։
Մեր հարցին, թե իրականում նոր ձեւավորվող կառավարությունը հեղափոխակա՞ն է, թե՞ հնի շարունակությունը, որի հետեւանքով երկիրը հայտնվել է տնտեսական ծանր վիճակում, Արմեն Ռուստամյանը պատասխանեց. «Լինելու է նոր ծրագիր, կառավարությունը չի բերելու հին ծրագիրը, բերելու է նոր ծրագիր, դա պահանջն է Սահմանադրության, եւ նոր ծրագրի մեջ, ես վստահ եմ, պետք է արտացոլվի այն նորությունը, որը տեղի է ունեցել հին կառավարության օրոք՝ այն, որ կառավարությունը կար, եւ ծրագիրը հետո եղավ մեր համագործակցության հետ կապված եւ սա չի կարող չանդրադառնալ նոր կառավարության անելիքների վրա։ Խնդիրը այս տրամաբանության մեջ պետք է դիտարկել»։
