Կառավարությունը հապշտապ չեն վերաձեւում: Այս մասին սեպտեմբերի 28-ին ԱԺ-ում «Հայաստանի Հանրապետության կառավարության կառուցվածքի մասին» օրենքում փոփոխությունների օրինագծի քննարկման ժամանակ հայտարարել է նախկին վարչապետ, ընդդիմադիր պատգամավոր Հրանտ Բագրատյանը:
Նրա կարծիքով՝ կառավարության կառուցվածքում ինչ-որ փոփոխություններ կարող են առաջարկել միայն այն դեպքում, երբ այդ կառավարությունը աշխատանքի ծրագիր ունի: Բայց կառավարության ներկայացուցիչը՝ ի դեմս արդարադատության նախարար Արփինե Հովհաննիսյանի, բացահայտ հայտարարում է, որ վերակազմավորման առաջարկները վերջնական չեն եւ կարող են փոփոխվել:
«Այդպես չի լինի: Հավատացեք ինձ, այդպիսի գործերն այդպես չեն արվում: Սա ոչ մի լավ բանի չի բերի»,- ընդգծել է Բագրատյանը:
«Լավատես եղեք, պարոն Բագրատյան: Ամեն ինչ լավ կլինի»,- արձագանքել է ԱԺ փոխնախագահ Էդուարդ Շարմազանովը:
Օրինագծի համաձայն՝ նախատեսվում է Էկոնոմիկայի նախարարությունը վերանվանել Տնտեսական զարգացման եւ ներդրումների նախարարություն, Տրանսպորտի եւ կապի նախարարությունը՝ Տրանսպորտի, կապի եւ տեղեկատվական տեխնոլոգիաների, Էներգետիկայի եւ բնական պաշարների նախարարությունը՝ Էներգետիկ ենթակառուցվածքների եւ բնական պաշարների: Առաջարկվում է Քաղաքաշինության նախարարությունը վերակազմավորել Ճարտարապետության եւ մշակույթի հուշարձանների պահպանության կոմիտեի: