MH17 ինքնաթիռի անկումը հետաքննող միջազգային խումբը պնդում է, որ ինքնաթիռը խոցած զենիթա-հրթիռային «Բուկ» համալիրը, որը Ռուսաստանի տարածքից Ուկրաինա էր եկել, 2014 թվականի հուլիսի 18-ի առավոտյան վերադարձել է ՌԴ: Այդ մասին հայտնել է Նիդերլանդների ազգային ոստիկանության կենտրոնական քննչական կոմիտեի ղեկավար Վիլբերտ Պաուլիսսենը` ներկայացնելով միջազգային քննչական խմբի հետաքննության արդյունքները, հայտնում է «ՌԻԱ Նովոստին»:
«Մալայզիական ավիաուղիների» Boeing 777-ը, որը МН17 չվերթով Ամստերդամից Կուալա Լամպուր էր թռչում, Դոնեցկի մարզում վթարի էր ենթարկվել 2014 թվականի հուլիսի 17-ին: Զոհվել էին ինքնաթիռում գտնվող բոլոր 298 ուղեւորները:
Պաուլիսսենի խոսքով, հրթիռ արձակելուց հետո «Բուկ»-ն ինքնուրույն ընթացել է Սնեժնիի ուղղությամբ, հետո հուլիսի 17-ի ուշ երեկոյան բեռնվել է բեռնատար մեքենա»: Պաուլիսսենը հայտնել է, որ այնուհետեւ «Բուկ»-ն իբր անցել է Կրասնի Լուչով, Դեբալցեւոյով եւ Լուգանսկով:
«Վաղ առավոտյան «Բուկ»-ը, որում միայն երեք հրթիռ է եղել, անցել է ռուսական սահմանը», — հայտնել է Պաուլիսսենը:
Պատասխանելով այն հարցին, թե հետո ինչ է պատահել «Բուկ»-ին, նա հայտնել է. «Մենք ցույց ենք տվել այն, ինչի վերաբերյալ բավականաչափ տվյալներ ունենք, դա ավարտվում է ռուսական սահման հասնելով»: «Հետագա հետաքննությունը ցույց կտա, թե այնուհետեւ ինչ է տեղի ունեցել», — հայտնել է ոստիկանության դեպարտամենտի ղեկավարը:
Երկուշաբթի ռուսաստանյան Օդատիեզերական ուժերի ռադիոտեխնիկական զորքի պետ, գեներալ-մայոր Անդրեյ Կոբանը հայտնել է, որ «այն փաստը, որ Ուկրաինան մինչ օրս չի հրապարակել ՌԼԿ-ի տեղեկությունը, թույլ է տալիս ենթադրել, որ հրթիռի արձակման վայրը, եթե դա «Բուկ»-ն է եղել, եղել է ՈՒԶՈՒ-ի վերահսկողության տակ գտնվող տարածքում»: Միաժամանակ ռուսաստանցի զինվորականներն ավելի վաղ հայտնել էին, որ ՌԴ-ն երբեք Ուկրաինայի կամավորներին «Բուկ» ԶՀՀ չի փոխանցել, ինչպես եւ այլ մարտական տեխնիկա:
ՌԴ նախագահի մամուլի քարտուղար Դմիտրի Պեսկովը չորեքշաբթի հայտնել է, որ ռուսական կողմը սպառիչ տեղեկություններ է տրամադրել MH17-ի աղետի վերաբերյալ: Նա հավելել է, որ Մոսկվան ցավով նշում է, որ ոչ բոլոր երկրներն են տեղեկությունների նման զանգված տրամադրել: Նրա խոսքով, «որոշ երկրներ առաջվա նման չեն ներկայացրել, օրինակ, ռադարային տվյալներ»:
Պեսկովը հայտնել է նաեւ, որ Մոսկվան կգնահատի MH17 ինքնաթիռի հոլանդական հետաքննության արդյունքները: Նա ընդգծել է, որ «կարեւոր է եզրահանգումներ անել` հաշվի առնելով վերջին տեղեկատվությունը, որը հրապարակվել է մեր զինվորականների կողմից` ռադարների առաջնային տվյալները»:
