Հայաստանի քննչական կոմիտեի վարույթում քննվող քրեական գործերով քննության որակը եւ արդյունավետությունը բարձրացնելու ուղղությամբ ձեռնարկված միջոցառումների արդյունքում էապես բարելավվել են մի շարք հանցատեսակների բացահայտման ցուցանիշները, կրճատվել նախաքննության ժամկետները։

Մասնավորապես՝ 2016 թվականի առաջին 6 ամիսներին  գրանցվել է սպանության 41 դեպք, որից  38-ը կամ 90,2 տոկոսը բացահայտվել է։ Նկատենք, որ նախորդ տարվա նույն ժամանակահատվածի համեմատությամբ բացահայտումը բարելավվել է 27 տոկոսով:

2015 թվականին գրանցված սպանության 38 դեպքից բացահայտվել էր 63,1 տոկոսը, իսկ 2016 թվականի 9 ամսվա տվյալներով՝ բացահայտումն արդեն կազմել է 93,1 տոկոս (9 ամսվա ընթացքում գրանցվել է սպանության 58 դեպք, որից 54-ը բացահայտվել է)։ էապես՝ 27,5 տոկոսով, բարելավվել են  ավազակային հարձակումների բացահայտումները՝ կազմելով 71 տոկոս՝ 2015 թվականի 43,5 տոկոսի դիմաց։

Որոշ դրական տեղաշարժ է նկատվել նաեւ բնակարանային գողությունների  բացահայտման աշխատանքներում. այս տարի բացահայտման ցուցանիշը բարելավվել է շուրջ 8 տոկոսով՝ կազմելով 31 տոկոս՝ նախորդ տարվա 23 տոկոսի դիմաց։

Սպանության փորձերի բացահայտումը կազմել է 100, բռնաբարության եւ բռնաբարության փորձերի ցուցանիշը՝ 94,1, խարդախության դեպքերի բացահայտումը՝ 91 տոկոս։

Ընդհանուր առմամբ 2016 թվականի առաջին կիսամյակում քննչական կոմիտեի քննիչներն աշխատել են մեծ ծանրաբեռնվածության պայմաններում. 6 ամսվա ընթացքում քննիչի միջին ծանրաբեռնվածությունը կազմել է 26.6 գործ. Կոմիտեի քննիչների վարույթում քննվել է ընդհանուր առմամբ 12601 քրեական գործ։

Այդուհանդերձ՝ քննությունը ճիշտ պլանավորելու, ճիշտ կազմակերպելու արդյունքում կրճատվել են նախաքննության ժամկետները։ Այսպես՝ եթե 2015 թվականի առաջին կիսամյակում քննված քրեական գործերից մինչեւ երկու ամիս ժամկետում ավարտվել է 1750, ապա 2016 թվականի առաջին կիսամյակում՝ արդեն 2068 քրեական գործ։