Իրավապաշտպան Freedom House կազմակերպությունը հայտարարությամբ է հանդես եկել Ադրբեջանում սեպեմբերի 26-ին անցկացված հանրաքվեի վերաբերյալ, հայտնում է contact.az-ը:
Հայտարարության մեջ նշվում է, որ չնայած ընտրական գործընթացի կոպիտ խախտումներին, ԿԸՀ-ն գրանցել է քվեարկության արդյունքները եւ հաստատել Սահմանադրության փոփոխությունները: «Ընդունելով քվեարկության արդյունքները` Կենտրոնական ընտրական հանձնաժողովը խախտել է սեփական պահանջները: Արդյունքները հաստատվել են, չնայած կեղծարարության ակնհայտ փաստերին. քվեաթերթիկների զանգվածային լցոնումներ, դրանք արձանագրողների եւ դրա դեմ բողոքողների ձերբակալություն եւ այլ խախտումներ», հայտնել է կազմակերպության փոխտնօրեն Ռոբերտ Հերմանը:
«Դրանով անհարգալից վերաբերմունք է դրսեւորվել Ադրբեջանի քաղաքացիների իրավունքների հանդեպ», - հավելել է նա: Հայտարարության մեջ հիշատակվում է, որ ԿԸՀ-ն հայտնել է, թե բնակչության 90 տոկոսն իր աջակցությունն է հայտնել սահմանադրության փոփոխություններին, ինչպես նաեւ հիշեցնում է, որ Եվրոպայի Խորհրդի Վենետիկի հանձնաժողովն առաջարկված փոփոխությունները ոչ ժողովրդավարական է ճանաչել: