«Սասնա ծռեր» խմբին օժանդակելու մեղադրանքով կալանավորված Մարտին Վարդանյանի խափանման միջոց կալանքը երկու ամսով երկարաձգվել է: NEWS.am-ի հետ զրույցում նրա եղբայրը` Պարույրը, նշեց, որ իր եղբայրը հոգեպես ծանր վիճակում է գտնվում:
«Արդեն երկու ամիս չի տեսել իր երկու անչափահաս երեխաներին, հոգեպես ճնշված է: Տեսակցություն էինք խնդրել գոնե, որ երեխաներին տեսնի` դա էլ թույլ չտվեցին, ոչ էլ մեզ հետ է հանդիպել»,-ասաց նա:
Պարույրը նշեց, որ իր հայրը` Հովհաննես Վարդանյանը, որը գտնվում է «Նուբարաշեն» ՔԿՀ-ում, եւս լուրջ առողջական խնդիրներ ունի, տառապում է Երեւանյան հիվանդությամբ եւ այդ վիճակում չի կարող մնալ անազատության մեջ:
Ավելի վաղ Մարտին Վարդանյանի փաստաբան Ստեփան Ոսկանյանը մեզ հետ զրույցում նշել էր, որ Մարտին Վարդանյանին մեղադրանք են առաջադրել` այդ կերպ ճնշում գործադրելու համար «Սասնա ծռեր» խմբի կազմում գտնվող նրա հոր՝ Հովհաննես Վարդյանյանի նկատմամբ: Նա նշել էր, որ իր պաշտպանյալի նկատամամբ առաջադրված մեղադրանքը հիմնավորված չէ, նրան մեղադրում են «Սասնա ծռեր» խմբին անդամների հեռախոսները լիցքավորելու եւ նրանց համար աջակիցներ փնտրելու մեջ։
Մարտին Վարդանյանին ձերբակալել են հունիսի 22-ին, 25-ին մեղադրանք առաջադրել ու կալանավորել։
Մարտին Վարդանյանը դատարանում հայտարարել էր, որ ինքը ոչ մի գործողություն չի կատարել, իրեն մեղադրանք են ներկայացրել հոր հետ խոսեւլու համար։