Բեռնատար տրամադրելու միջոցով «Սասնա ծռեր» խմբին օժանդակելու մեջ մեղադրվող 69-ամյա Խաչատուր Գիչյանին «Դատապարտյալների հիվանդանոց» ՔԿՀ-ից տեղափոխել են կալանավայր: Այս մասին NEWS.am-ին հայտնեցին Քրեակատարողական վարչության հասարակայնության հետ կապերի վարչությունից:
Խաչատուր Գիչյանի որդին տեղեկացրեց, որ հայրը գտնվում է «Նուբարաշեն» ՔԿՀ-ի բուժմասում:
Հիշեցնենք, որ Գիչյանի ինքնազգացողությունը վատացել էր դատարանում, որտեղ նրան տարել էին կալանքի ժամկետը երկարացնելու համար: Գիչյանը նախկինում սրտի կաթված է տարել:
Գիչյանը Վրաստանի քաղաքացի է: Նա ցուցմունք էր տվել, որ երբ իմացել է, թե ինչ նպատակի է ծառայելու իր մեքենան, այն չի տվել «Սասնա ծռեր» խմբի տղաներին, որոնք մի քանի անգամ եկել են իր տուն, ուսումնասիրել բեռնատարը: Նա ասել է, որ մերժելուց հետո սպառնացել են ընտանիքի հետ հաշվեհարդար տեսնել, ինչից հետո ստիպված է եղել բեռնատարը տրամադրել նրանց: Ավելի ուշ փաստաբանն ասել էր, որ Գիչյանը փոխել է նախնական ցուցմունքը։