Ղրղզստանում ազատազրկման երկարատեւ ժամկետների են դատապարտվել ահաբեկչական «Իսլամական պետություն» խմբավորման անդամները, որոնք երկրի հարավում սպանություններ էին նախապատրաստել, հայտնում է «ՌԻԱ Նովոստին»:
«Օշյան քաղաքային դատարանը վճիռ է կայացրել ԻԼԻՊ միջազգային ահաբեկչական կազմակերպության չորս անդամի նկատմամբ, որոնք ձերբակալվել են Ղրղզստանի Հանրապետության ԱԱՊԿ-ի կողմից, նրանց մեղադրանք էր ներկայացվել անօրինական զինված խմբավորումների անդամակցելու, ավազակության, ահաբեկչության ֆինանսավորման համար: Մասնավորապես, քաղաքացի Խ.Ա.-ն, 1995 թվականին ծնված, դատապարտվել է 16 տարվա ազատազրկման, քաղաքացուհի Ռ.Ա.-ն, 1989 թվականին ծնված, տասը տարվա ազատազրկման է դատապարտվել», — ասված է հաղորդագրության մեջ:
Ղրղզստանի ազգային անվտանգության պետական կոմիտեից հայտնել են, որ դատարանը Ուզբեկստանի 1994 թվականին ծնված եւս երկու քաղաքացու դատապարտել է 17 եւ 18 տարվա ազատազրկման` պատիժը խստացված ռեժիմի գաղութում կրելով:
Հատուկ ծառայությունից պարզաբանել են, որ տվյալ ահաբեկչական խումբը ձեւավորվել է WhatsApp եւ «Օդնոկլասնիկի» սոցցանցերի միջոցով: