Բյուրեղավանի Glass World Company շշերի գործարանի մի քանի տասնյակ նախկին աշխատակիցներ, որոնք իրենց 5 ամսվա աշխատավարձը դեռ չեն ստացել, այսօր` սեպտեմբերի 29-ին, բողոքի ակցիա են անում կառավարության շենքի դիմաց:
NEWS.am-ի հետ զրույցում Սեւան Մանուչարյանը, որը Glass World Company-ում որպես բեռնափոխադրող է աշխատել, նշեց, որ գործարանն իրեն պարտք է 890 հազար դրամ, եւ ամեն ամիս գործարանի տնօրինությունը ձգձգում է գումարի վճարումը:
«Նրանցը, ումը փոքր գումար է եղել, տվել են, կամ էլ ծանոթ են եղել, դրա համար են տվել: Մենք հույս չունեինք այլեւս, չէինք պայքարում, բայց նոր վարչապետն եկավ, նոր հույսեր ունենք, որ գոնե մի բան կփոխվի: Ամեն ինչը քանդել են, գործարանը սնանկացրել են, այժմ տնօրենը Արմեն Թորոսյանն է: Բացի այն, որ գումարը չեն տալիս, ամեն անգամ հույս են տալիս, որ առողջացման ծրագիր են որոշել, գործարանի կրկին կգործի, բայց գործարանը առողջանալու փոխարեն, իրենք են առողջանում»,-ասաց նա:
Ավելի վաղ NEWS.am-ը տեղեկացրել էր, որ Glass World Company ընկերության շուրջ 150 աշխատակցի 5 ամսվա աշխատավարձ չի վճարվել: Նրանք գործարանի դիմաց պարբերաբար բողոքի ակցիաներ էին անցկացնում՝ իրենց աշխատավարձերի վճարման պահանջով:
