Սեպտեմբերի 29-ին ԱԺ-ում երկրորդ ընթերցմամբ ընդունվեց Հարկային օրենսգրքի նախագիծը, հայտնում է NEWS.am-ի թղթակիցը:
Կողմ է քվեարկել 79 պատգամավոր, դեմ՝ 24, ձեռնպահ է մնացել մեկը:
Մինչ քվեարկությունը «Օրինաց երկիր» խմբակցության ղեկավար Հեղինե Բիշարյանը նշել է, որ նախագիծը քննարկվել է դատարկ դահլիճում: Ըստ որում, նրա կարծիքով, փաստաթուղթը պատշաճ կարգով չի քննարկվել՝ առանց բիզնես միջավայրի ներկայացուցիչների մասնակցության:
«Համոզված եմ, որ պատգամավորներն անգամ չեն հասցրել փաստաթղթին ծանոթանալ, չնայած այն բանին, որ այդ փոփոխությունները շոշափում են խորհրդարանականների 80 տոկոսի շահերը: Այդ ամենը նկատի ունենալով՝ մեր խմբակցությունը դեմ կքվեարկի»,- ասել է նա:
Ընդդիմադիր պատգամավոր Ռուբեն Հակոբյանը համաձայնել է իր գործընկերոջ հետ՝ նշելով, որ ինքը եւս մտադիր է դեմ քվեարկել:
«Բարգավաճ Հայաստան» խմբակցության ղեկավար Նաիրա Զոհրաբյանը կոչ է արել օրակարգից հանել այդ օրինագիծը, որը բիզնեսի համար աղետալի հետեւանքներ կունենա: Նա նաեւ իշխող կուսակցության պատգամավորներին կոչ է արել չքվեարկել փաստաթղթի օգտին, եթե նույնիսկ իրենց վրա ճնշում է գործադրվել:
ԱԺ խոսնակ Գալուստ Սահակյանը չհամաձայնեց ընդդիմադիր պատգամավորների հետ՝ նշելով, որ օրինագիծն անցել է անհրաժեշտ քննարկումները, եւ դրանում փոփոխություններ են կատարվել:
ՀՀԿ խմբակցության պատգամավոր Վարդան Այվազյանը գործընկերներին կոչ արեց խոսելուց առաջ մտածել: Նրա խոսքով՝ այդ փաստաթուղթը քննարկվել է 25 անգամ, պահանջների եւ դիտողությունների մեծ մասը բավարարվել է:
ՀՀԿ խմբակցության ղեկավար Վահրամ Բաղդասարյանն էլ իր հերթին նշեց, որ փաստաթղթից դժգոհ են այն պատգամավորները, որոնք, ըստ էության, չեն մասնակցել քննարկմանը. «Մեր խմբակցությունը որոշել է քվեարկել օրինագծի օգտին»:
Մասնավորապես, առաջարկվում է եկամտահարկի միջին դրույքաչափը նվազեցնել: Առաջին ընթերցման խմբագրմամբ առաջարկվում էր այն նվազեցնել մինչեւ 204 հազար դրամ աշխատավարձերի համար, երկրորդ ընթերցմամբ՝ արդեն մինչեւ 280 հազար դրամ (այսինքն՝ աշխատող քաղաքացիների 90 տոկոսի համար):
Չեղարկվել է այն շահաբաժիններից շահութահարկի գանձումը, որոնք կվերաներդրվեն ձեռնարկության մեջ: Առաջարկվել են եկամտահարկի կանխավճարների այլընտրանքներ՝ շահույթի նվազեցման դեպքերի համար: Կհանվեն սխալներով դուրս գրված ապրանքագրերի չեղարկման սահմանափակումները, այժմ դրանք հնարավոր է չեղարկել եւ փոխել առանց սահմանափակման:
Միանգամից 5 անգամ մեծացվում են խաղատների պետական տուրքերը՝ տարեկան 190-ից 500 մլն դրամ: Դա թույլ կտա ծածկել եկամտահարկի նվազեցման հետեւանքով եկամուտների կրճատումները:
ԱԱՀ շեմը կվերադարձվի տարեկան 115 մլն-ից մինչեւ նախկին 58,35 մլն դրամը (մոտ 122 հազար դոլար):