Կանադահայ հայտնի դերասանուհի Արսինե Խանջյանը Սփյուռքին ուղղված բաց նամակ է գրել՝ կոչ անելով 2017-ի խորհրդարանական ընտրություններում հանդես գալ որպես դիտորդներ՝ երկրում արդար եւ ազատ, թափանցիկ ընտրություններ ապահովելու համար:
Իր նամակում Խանջյանը հայտնել է Երեւանում տեղի ունեցած հանրահավաքի ժամանակ (ոստիկանության ՊՊԾ գնդի գրավման իրադարձությունների ժամանակ – խմբ.) իր ձերբակալության մասին, որն իրեն ստիպել է հասկանալ, որ Սփյուռքը Հայրենիքի հետ փոխհարաբերությունների բնույթը պետք է վերանայի:
«Երկրում մեծ թվով ներքին խնդիրներ կան, որոնք կապված են համակարգված կոռուպցիայի, հովանավորչության եւ օլիգարխիկ տնտեսության հետ, որտեղ իշխանությունը եւ հարստությունը մնում են փոքրաթիվ մարդկանց ձեռքում: Արդարացի իրավական պետության բացակայությունը՝ խոսքի եւ մտքի ազատության, ինչպես նաեւ քաղաքացիական ազատությունների եւ իրավունքների ճնշման համադրությամբ ավելի է խորացնում հանրապետությունում առանց այն էլ անտանելի իրավիճակը»,- գրել է նա:
Խանջյանը 8-միլիոնանոց Սփյուռքին կոչ է արել Հայաստան գալ 2017-ի գարնանը եւ առաջիկա խորհրդարանական ընտրություններում ներկա լինել յուրաքանչյուր ընտրատեղամասում:
Հայտնի դերասանուհին կարծում է, որ Սփյուռքը չի կարող կողմնակի դիտորդ մնալ, այլ պետք է արձագանքի «մեր հայրենակիցնեորի խնդրանքներին»:
