ՀՀ վարչապետ Կարեն Կարապետյանը պրիմիտիվ գողություն ասելով նկատի ուներ, որ կառավարության մեջ գործառույթներ կան, որոնք ճիշտ ձեւով չեն իրագործվում եւ առաջացնում են որոշակի բողոքներ։ Այս մասին այսօր՝ սեպտեմբերի 29-ին, ԱԺ-ում լրագրողների հետ զրույցում ասաց ԱԺ նախագահ Գալուստ Սահակյանը։
«Գողությունը գողանալ բառը չէ։ Այն երեւույթը, որը կառավարության անդամները՝ ներքեւից մինչեւ վերեւ պիտի օգտագործեն, երբեմն-երբեմն չի կատարվում դա։ Եվ դա վարչապետը համարեց որպես գողություն։ Ոչ թե գողական ասպարեզի մարդիկ գողանում տանում են, չգիտեմ ինչեր են անում, այլ պարզապես չկիրառելը համարեց գողություն»,- ասաց Գալուստ Սահակյանը։
ԱԺ նախագահի խոսքով՝ եթե ինչ-որ մեկը գիտի, ովքեր են գողերը, համապատասխան մարմիններին պետք է տեղեկացնի։
«Կառավարության գողությունների համար պիտի գրի նա, ով տեսել է այդ գողությունները»,- նշեց նա։
Հիշեցնենք, որ նորանշանակ վարչապետ Կարեն Կարապետյանը հայտարարել էր, որ պետական ապարատում «պրիմիտիվ գողությանը» պետք է վերջ դնել: