Սան Դիեգոյի արվարձան հանդիսացող ամերիկյան Էլ Կահոնայի (Կալիֆորնիայի նահանգ) ոստիկանական վարչությունը խոստովանել է, որ իր աշխատակիցները, որոնք երեքշաբթի սեւամորթի են գնդակահարել, էլեկտրոնային ծխախոտն իրենց ուղղված ատրճանակի տեղ են դրել, հայտնում է ABC հեռուստաընկերությունը:
Ալֆրեդ Օլանգոն, որը 38 տարեկան էր, հիվանդանոցում մահացել է օրենքի պահապանի կողմից հրազենային վնասվածք ստանալուց մի քանի ժամ անց: Նրա սպանությունից հետո քաղաքում բողոքի ակցիաներ են տեղի ունեցել, որոնց տասնյակ մարդիկ են մասնակցել:
Տեղի ոստիկանության հայտարարության մեջ միջադեպի վերաբերյալ, որի զոհ է դարձել Օլանգոն, ասված է, որ օրենքի պահապանները կանչով եկել են փոքրիկ ռեստորանի մոտ, որովհետեւ սեւամորթ տղամարդն իրեն ոչ համարժեք է պահել, դուրս է եկել երթեւեկության հատված` խանգարելով մեքենաների շարժմանը: Նա հրաժարվել է ենթարկվել ոստիկանության աշխատակիցների պահանջներին, իսկ երբ վերջիններս փորձել են ձերբակալել նրան, անսպասելիորեն գրպանից հանել է ինչ-որ առարկա եւ այն ատրճանակի նման ուղղել իշխանության ներկայացուցիչների կողմը: Ոստիկանության աշխատակիցներից մեկն անմիջապես կրակ է բացել, իսկ մյուսն էլեկտրաշոկի սարքն է օգտագործել:
NBC հեռուստաընկերությունն ավելի վաղ հայտնել էր, որ ականատեսների խոսքով, Օլանգոն իր մոտ զենք չի ունեցել եւ ոչ մի կերպ չի սադրել օրենքի պահապաններին: Այն պահին, երբ սկսել են կրակել նրա ուղղությամբ, նա իբր կանգնած է եղել բարձրացված ձեռքերով: Օրենքի պահապանների հայտարարության մեջ նշվում է, որ երկու աշխաըտակից, որոնք եկել էին դեպքի վայր, գործող պրակտիկայի համաձայն, կհեռացվեն աշխատանքից մինչեւ միջադեպի մանրամասների պարզումը: Իշխանությունները հավաստիացրել են, որ մանրամասն հետաքննություն կանցկացնեն:
