ԱՄՆ-ի սպառողական ապրանքների անվտանգության հանձնաժողովը (Consumer Product Safety Commission) երկրի բնակիչներին զգուշացրել է Samsung լվացքի մեքենաների օգտագործման վտանգավորության մասին:
Զգուշացումը տարածվել է այն հաղորդագրությունների հետ կապված, թե մեքենաները պայթում են աշխատանքի ընթացքում, հայտնում է CNN Money կայքը:
Խոսքն ուղղահայաց բեռնմամբ մեքենաների մասին է, որոնք թողարկվել են 2011-ի մարտից մինչեւ 2016 թվականի ապրիլն ընկած ժամանակահատվածում, միաժամանակ նմուշի անվանումը չի նշվում:
Մոտ մեկ ամիս առաջ սպառողները խմբային հայտ են ներկայացրել ընկերությանը: Նյութերում ներկայացված են տեղի ունեցածի վերաբերյալ բողոքները: Այսպես` Թեքսասի բնակչուհիներից մեկի խոսքով, պայթյունը «այնքան ուժեղ էր, որ վնասել է ավտոտնակի ներսը»: Դալլասից մի կին տեղի ունեցածն այսպես է ներկայացրել. «ասես ռումբ պայթեր»:
Samsung-ից հայտնել են, որ ընկերությունն ԱՄՆ-ի իշխանությունների հետ աշխատում է խնդրի կարգավորման ուղղությամբ: