Բասրա քաղաքում Սադամ Հուսեյնի նախկին ապարանքը թանգարանի են վերածել, գրում է Luxury Listings-ը:
Թանգարանում ներկայացված են հնագիտական իրեր, այդ թվում՝ մ.թ.ա. 400-րդ թվականի դրամներ, կավե սպասք: Թանգարանի տնօրենի խոսքով՝ պալատն ընտրվել է որպես ցուցադրության վայր, որպեսզի բռնապետության մթնոլորտը փոխարինվի մարդասիրական արժեքներով:
Ֆինանսական դժվարությունների պատճառով թանգարանում աշխատում է միայն մեկ սրահ:
Իրաքի նախկին նախագահն այդ պալատում էր ապրում, մինչեւ 2003-ին իշխանազուրկ դառնալը: Դրանից հետո այնտեղ տեղակայվել էր բրիտանական բանակի ճաշարանը:
Իրաքի նախագահը պաշտոնավարել է մինչեւ 2003 թվականը, երբ Իրաք մտավ ԱՄՆ ղեկավարած կոալիցիան՝ Մեծ Բրիտանիայի եւ Ավստրալիայի աջակցությամբ: 2006-ի նոյեմբերին Սադամ Հուսեյնին մահվան դատապարտեցին: