Հայաստանը զարգանում է շատ ավելի դանդաղ, քան մյուս զարգացող երկրները, եւ նրա զարգացումը առայժմ չի նկատվում: Այս մասին, այսօր՝ սեպտեմբերի 29-ին, «Տնտեսական աճի հիմնախնդիրները Հայաստանում՝ երրորդ սերնդի բարեփոխումեր, ներդրումային միջավայր և զարգացման նախադրյալներ» թեմայով քննարկման ժամանակ, լրագրողների հետ զրույցում նշել է ակադեմիկոս, ռուս խոշոր գիտնական Աբել Աղանբեկյանը:
Նրա խոսքով, Հայաստանի տնտեսական զարգացումը շատ բազմազան է, օրինակ ինֆորմատիզացիայի ծրագրի ընդունումը համապատասխանում էր իր ներկայացրած առաջարկին. «Իհարկե, շատ բան է արվում իմ նախանշած ուղղություններով, բայց տնտեսական զարգացման տեմպերը շատ չափավոր են: Հայաստանը զարգանում է մոտավորապես համաշխարհային զարգացման մակարդակով, այսինքն շատ ավելի դանդաղ, քան մյուս զարգացող երկրները, եւ նրա զարգացումը առայժմ չի նկատվում»:
Հարցին, թե ինչ է պետք անել Հայաստանի տնտեսությունը զարգացնելու համար, Աղանբեկյանը պատասխանեց. «Պետք է ծրագիր, ռազմավարություն հիմա Հայաստանում շատ հարմար պահ է, նոր Կառավարություն է` Կարեն Կարապետյանի գլխավորությամբ, իմ լավ ծանոթի, ես նրա հետ բազմաթիվ անգամ հանդիպել եմ, երբ զբաղվում էի Հայաստանի տնտեսությամբ: Պետք է ասեմ, որ կարելի է մեծ հույսեր կապել նրա հետ»:
Նա չկարեւորեց, ՀՀ նոր վարչապետը կլսի իր խորհուրդները թե ոչ. «Դա այդքան էլ կարեւոր չէ` կլսի նա ինձ, ձեզ, կամ էլի ինչ-որ մեկի: Նա ինքնուրույն մարդ է եւ կարեւորն այն է, որ գործ լինի, ոչ թե թե՝ ում կլսի:
Նշենք, որ քննարկմանը Աղանբեկյանը ներկայացրեց 120 էջանոց իր աշխատություն՝ Հայաստանի ներդրումային հնարավորությունների վերաբերյալ: