Հայաստանում անհնար է որեւէ բան արդյունավետ արտադրել, եթե այն չես արտահանելու: Այս մասին, այսօր՝ սեպտեմբերի 29-ին, «Տնտեսական աճի հիմնախնդիրները Հայաստանում՝ երրորդ սերնդի բարեփոխումեր, ներդրումային միջավայր և զարգացման նախադրյալներ» թեմայով քննարկման ժամանակ, լրագրողների հետ զրույցում նշել է ակադեմիկոս, ռուս խոշոր գիտնական Աբել Աղանբեկյանը:
Անդրադառնալով փաստին, որ Հայաստանը ԵՏՄ անդամ է, սակայն փորձում է զարգացնել հարաբերությունները նաեւ ԵՄ-ի հետ, հնարավո՞ր է երկու ձիու վրա նստել, եւ որքանով է արդյունավետ ԵՏՄ-ին անդամակցությունը, ակադեմիկոսն արձագանքեց. «Մենք երկու ձիու վրա չենք նստած, դուք մոռացաք Չինաստանը, որի հետ եւ Հայաստանը, եւ Ռուսաստանը արտաքին առեւտրաշրջանառության խոշոր բաժին ունի, Հայաստանի դեպքում մի քիչ ավելի փոքր, քան եվրոպական երկրների հետ:
Պետք է բոլորի հետ ունենալ լավ, լայն առեւտրատնտեսական հարաբերություններ, հնարավոր չէ էֆեկտիվ լինել մեկուսացված վիճակում»:
Աղանբեկյանը արդյունավետ համարեց Հայաստանի համագործակցությունը ԵՏՄ- շրջանակներում. «Շատ արդյունավետ է, Եվ Ռուսաստանն է այդ համագործակցությունից մեծ արդյունք ստանում, եւ Հայաստանը: Հասկանում եք` Հայաստանը շատ նեղ, ներքին շուկա ունեցող երկիր է, փոքր էկոնոմիկայով: Հայաստանում անհնար է որեւէ բան արդյունավետ արտադրել, եթե այն չես արտահանելու: Իսկ Հայաստանի արտահանումը շատ փոքր է»:
Նշենք, որ քննարկմանը Աղանբեկյանը ներկայացրեց 120 էջանոց իր աշխատություն՝ Հայաստանի ներդրումային հնարավորությունների վերաբերյալ:
