Հունգարիայի Կանաչների կուսակցությունն աշխատում է Հայոց ցեղասպանության ճանաչման փաստաթղթի վրա: Այս մասին NEWS.am-ի թղթակցի հետ զրույցում հայտարարել է «Քաղաքականությունը կարող է այլ լինել» (LMP) կուսակցության ներկայացուցիչ Պետեր Ունգարը:
Նրա խոսքով՝ Հունգարիայի խորհրդարանի բանաձեւի նախագծում Հայոց ցեղասպանության ճանաչման դրույթ կա: «Մենք դեռեւս հնարավորություն չենք ունեցել փաստաթուղթը խորհրդարանի արտաքին հարաբերությունների կոմիտեին ներկայացնելու համար: Մենք խորհրդարանում փոքրամասնություն ենք, եւ առայժմ հայտնի չէ, թե երբ կկարողանանք փաստաթուղթը ներկայացնել»,- նշել է Ունգարը
Միեւնույն ժամանակ, նա խոստովանել է, որ Հունգարիայի կառավարությունը Թուրքիայի հետ սերտ հարաբերություններ ունի, եւ շատ բարդ կլինի փաստաթուղթն անցկացնել: Սակայն, քաղաքական գործչի խոսքով, կուսակցությունը կպայքարի, որպեսզի բանաձեւի նախագիծը ներկայացվի կոմիտեում:
Նշենք, որ «Քաղաքականությունը կարող է այլ լինել» կուսակցությունը ազատական ուղղության կանաչների կուսակցություն է, որը հինգ պատգամավոր ունի Հունգարիայի 199 պատգամավոր ունեցող Ազգային ասամբլեայում:
