Գյումրիում կայանալիք ընտրություններում ՀԱԿ-ի ցուցակը գլխավորող, միակ կին թեկնածու Սյուզի (Եպրաքսյա) Մեխակյանն իր ուժերին հավատում է, համոզված է՝ գյումրեցին իր ձայնը հենց իրեն ու Կոնգրեսին է տալու:
«Ես միայնակ չեմ, զորեղ թիմ ունեմ, ՀԱԿ-ն էլ իմ թիկունքում է: Գյումրիում ինձ հարգում են, ճանաչում են: Այնպես չէ, որ հեռուստահաղորդավարուհի եմ կամ հայտնի արտիստ, բայց ես «Շրջապատ» թերթի գլխավոր խմբագիրն եմ: Թերթ, որը 12 տարի բոլորի հոգսը հոգացել է, բոլորի տները մտել է, շատ հաճախ հարցերի լուծումներ ենք տվել: Ես այն մարդն եմ, որն իրենց միջից է, դուխս տեղն է: Երբ որ ասում են՝ ելել ես էս գելերի դեմը, ի՞նչ ես անելու, ասում եմ՝ գելխեղդ եմ անելու»,- NEWS.am-ի հետ զրույցում ասում է Սյուզի Մեխակյանը:
Ըստ ՀԱԿ-ի թեկնածուի՝ քարոզարշավի ընթացքում «կեղտոտ քայլեր» իրենց կուսակցության նկատմամբ եղել են, սակայն իրենք դրանց ուշադրություն չեն դարձնում:
«Շան տեղ չենք դնում... ովքեր փորձեցին լարվածություն մտցնել, ոնց որ իրար միս կերան, թե չկերան, Աստված իրենց հետ, մենք ընտրել ենք կոռեկտ քարոզարշավ անցկացնելու տարբերակը»:
Ինչ վերաբերում է Գյումրիի խնդիրներին ու դրանց առաջնահերթ լուծում տալուն, Սյուզի Մեխակյանը նշում է, որ ինքը գյումրեցիներին էլ է խոստովանում, որ շատ բան անել չի կարող, բայց կարող է աշխատել. «Ասում եմ՝ թողեք աշխատենք: Որն էլ գալու է, ասելու է, թե մեծ արդյունաբերություն է դնելու, չկա նման բան»:
Նշենք, որ Գյումրիում հոկտեմբերի 2-ին կայանալիք ընտրություններին մասնակցում է 11 քաղաքական ուժ: Դաշինքով են հանդես գալու իշխող ՀՀԿ-ն եւ Խոսրով Հարությունյանի կուսակցությունը:
