ԱՄՆ նախագահի դեմոկրատ թեկնածու Հիլարի Քլինթոնը մեղադրել է իր մրցակից հանրապետական Դոնալդ Թրամփին ամերիկյան օրենսդրությունը խախտելու մեջ, հայտնում է BBC–ն
Պատճառը Newsweek պարբերականի հետաքննությունն է այն մասին, որ բիզնեսմենի վերահսկած ընկերությունները իբրեւ գաղտնի բիզնես են վարել Կուբայում այն ժամանակաշրջանում, երբ դա արգելված էր ամերիկյան օրենսդրությամբ՝ Ֆիդել Կաստրոյի ռեժիմի դեմ սահմանված պատժամիջոցների պատճառով:
Քլինթոնի խոսքով Թրամփի գործողությունները ցույց են տալիս, որ նա իր գործնական ու անձնական շահերը ԱՄՆ օրենքներից վեր է դասում :
Թրամփի նախկին աշխատակիցներից մեկը պատմել է, որ 1998-ին ընկերությունը 68 հազար դոլար է ծախսել Կուբա ուղեւորության վրա՝ նպատակ ունենալով համագործակցության համար բազա հարթել, եթե Վաշինգթոնը թուլացնի կամ վերացնի պատժամիջոցները : Պարբերականի տվյալներով Թրամփը գիտեր ուղեւորության կազմակերպման մասին:
Թրամփի ընտրական շտաբի ներկայացուցիչը հայտնել է, որ գումարը ծախսվել է, բայց Թրամփը հետո որոշել է ներդրումներ չանել Կուբայի տնտեսությունում:
