ՀՀ Հանրային խորհրդի նախագահ Վազգեն Մանուկյանը համաներում հայտարարելու հարցը քննարկելու է ՀՀ նախագահ Սերժ Սարգսյանի հետ:
Հանրային խորհրդից NEWS.am_ին հայտնում են, որ սեպտեմբերի 29-ին, ՀՀ Հանրային խորհրդում տեղի է ունեցել փոքր խորհրդի նիստի ժաանակ նշվել է, որ Հանրային խորհուրդը գրավոր եւ բանավոր դիմումներ է ստացել մի խումբ քաղաքացիներից եւ հասարակական կազմակերպություններից` դիմելու ՀՀ նախագահին ՀՀ անկախության 25-ամյակի առթիվ համաներում հայտարարելու վերաբերյալ:
Խորհրդի անդամները քննարկել են համաներում հայտարարելու անհրաժեշտությունը` այդ թվում եւ հուլիսյան դեպքերի հետ կապված:
Մասնավորապես, քննարկվել է քրեակատարողական հիմնարկների ծանրաբեռնվածության, ոլորտի բարեփոխումներին ուղղված քայլերի իրականացման անհրաժեշտությունը: Հանրային խորհուրդը համաներման հարցը քննարկել է նաեւ հասարակության շրջանում հատկապես հուլիսյան դեպքերից հետո առկա լարվածության թուլացման, հասարակական համերաշխության մթնոլորտի ձեւավորման տեսանկյունից, որի պայմաններում կապահովվի նաեւ նոր կառավարության արդյունավետ գործունեությունը:
Հանրային խորհուրդը լիազորել է ՀԽ նախագահ Վազգեն Մանուկյանին համաներման վերաբերյալ խորհրդի անդամների արտահայտած տեսակետները, համաներման տարածման շրջանակների առումով հնչած երբեմն հակադիր կարծիքները քննարկել երկրի ղեկավարի հետ:
Օրակարգի մյուս հարցը վերաբերել է «ՀՀ Հանրային խորհրդի մասին» օրենքի նախագծին եւ դրա շուրջ քննարկումների իրականացմանը:
Օրակարգի հաջորդ հարցով ՀԽ անդամներ Գրիգոր Բադիրյանն ու Ռուբեն Սաֆրաստյանը, որոնք ԵԱՀԿ դիտորդական առաքելության շրջանակներում Հանրային խորհրդի կողմից գործուղվել էին Ռուսաստանի Դաշնություն` որպես դիտորդ մասնակցելու ՌԴ պետդումայի ընտրություններին, գործընկերներին են ներկայացրել տեղեկատվություն ընտրությունների վերաբերյալ:
