Հայաստանում Վանաձորում է գրանցվել տեղական ինքնակառավարման մարմինների ընտրություններին մասնակցելուն քաղաքացիների պատրաստ լինելու, ըստ էության, ամենաբարձր ցուցանիշը. հարցվածների 86,8 տոկոսը կմասնակցի ընտրություններին: Այս մասին վկայում է սեպտեմբերի 23-28-ին Վանաձորում միջազգային սոցիոլոգիական Gallup International ասոցիացիայի Հայաստանի ներկայացուցչության անցկացրած հարցումը:
Հարցին՝ կմասնակցե՞ք հոկտեմբերի 2-ին նախատեսված տեղական ինքնակառավարման մարմինների եւ ավագանու ընտրություններին, հարցվածների 86,8 տոկոսը նշել է, որ կմասնակցի, «ոչ» է ասել 8,7 տոկոսը, 4,5 տոկոսը դժվարացել է պատասխանել այս հարցին:
«Հաջորդ հարցն այսպես էր ձեւակերպված՝ ո՞ր կուսակցությանը կտաք ձեր ձայնը: «Ոչ մի»՝ նշել է պատասխանողների 2,3 տոկոսը, 29,8 տոկոսը պատասխանելուց հրաժարվել է, 20,9 տոկոսը նշել է, որ դժվարանում է պատասխանել: Պատասխանողներից 0,4 տոկոսը նշել է, որ կքվեարկի «Քաղաքացիական պայմանագիր» կուսակցության օգտին, 2,7 տոկոսը՝ «Հայակական վերածնունդ», Հայաստանի Հանրապետական կուսակցությանն իր ձայնը կտա 30,3 տոկոսը, Հայ հեղափոխական դաշնակցությանը՝ 2,3 տոկոսը, Հայ ազգային կոնգրեսին՝ 0,2 տոկոսը, «Միասնություն» կուսակցությանը՝ 0,8 տոկոսը, «Լուսավոր Հայաստան» կուսակցությանը՝ 6,9 տոկոսը եւ «Բարգավաճ Հայաստան» կուսակցությանը՝ 3,9 տոկոսը»,- նշել է Gallup International-ի Հայաստանի ներկայացուցչության տնօրեն Արամ Նավասարդյանը: