Հանրապետական կուսակցության նախընտրական շտաբի ղեկավարի հարցը դեռ չի քննարկվել կուսակցությունում։ Այս մասին NEWS.am-ի հետ զրույցում վստահեցրեց Վահրամ Բաղդասարյանը՝ պատասխանելով հարցին, թե որքանո՞վ է հավանական՝ նախկին վարչապետ Հովիկ Աբրահամյանը ղեկավարի նախընտրական շտաբը։
«Ո՞վ է շտաբի հարց քննարկել, դեռ շատ երկար ժամանակ ունենք քննարկելու։ Շտաբի ղեկավարի մասին խոսելը դեռ վաղ է»,-ասաց ՀՀԿ խմբակցության ղեկավարը։
Հարցին՝ Հովիկ Աբրահամյանը վայելո՞ւմ է այնքան վստահություն, որ պաշտոնանկությունից հետո ստանձնի ՀՀԿ-ի օգտին ձայն հավաքելու դժվարին աշխատանքը, նա պատասխանեց. «Մենք վստահելի մարդիկ շատ ունենք, դրա համար պիտի շատ երկար քննարկենք՝ ով է շտաբում լինելու, եթե չունենայինք վստահելի մարդ, մեկ հոգի լիներ, քննարկման կարիք չէր լինի»։
Դիտարկմանը՝ նախկին վարչապետը շարունակո՞ւմ է մնալ վստահելիների թվում, ՀՀԿ խմբակցության ղեկավարը նշել է․ «Մեր գործադիրի անդամները վստահելի են»։ Վահրամ Բաղդասարյանը խուսափել է հստակ պատասխանել, թե իրենց «վստահելիներից» քանիսն են մնալու գործադիր մարմնում ձմռանը սպասվող կուսակցության համագումարից հետո։ Անդրադառնալով այն լուրերին, որ Աբրահամյանի հեռանալուց հետո, պաշտոնանկության շղթան կտարածվի նրա հովանավորյակների վրա ընդհուպ Արարատի մարզի իշխանության մակարդակով, Բաղդասարյանը շեշտեց․ «Մեր մեջ չկա իմ մարդը, Հովիկ Աբրահամյանի մարդը, կա թիմային գաղափար»։