2017-ի ընտրություններից հետո խորհրդարանից դուրս մնացող պատգամավորների ցանկում է նաեւ Քննչական կոմիտեի ղեկավար Աղվան Հովսեփյանի եղբայր, ՀՀԿ խմբակցության պատգամավոր Ռուբիկ Հովսեփյանը։
«Ես հաստատ չեմ լինելու հաջորդ խորհրադարանում»,-NEWS.am-ի հետ զրույցում ասաց պատգամավորը՝ նշելով, որ դա ոչ մի անգամ չի քննարկել իր հետ քաղաքական ղեկավարությունը, անձամբ է որոշել։
Անդրադառնալով նոր կառավարության ձեւավորմանը՝ Ռուբիկ Հովսեփյանը հիշեց իր ու Կարեն Կարապետյանի աշխատանքը, երբ Աջափնյակ համայնքի թաղապետ էր, իսկ Կարեն Կարապետյանը՝ Երեւանի քաղաքապետ։
«Ես աշխատել եմ վարչապետի հետ, որ քաղաքապետ էր ու դրական կարծիքի եմ։ Լավ չի՞, որ փողոցային առեւտորրը վերացրե՞ց։ Կաշխատի վարչապետ՝ կտեսնենք․․․ հիմա բոլորս միանգամից ընկել ենք, թե վայ խի էս փոփոխությունը եղավ, խի էն փոփոխությունը․․․․ աշխատանքը ցույց կտա»։
Ռուբիկ Հովսեփյանը դեմ չէ, որ հին, երկարամյա բարձրաստիճան պաշտոնյաներին փոխարինելու են գալիս երիտասարդներն ու հանրությանը անհայտ դեմքերը։ Իր եղբայր Աղվան Հովսեփյանի պաշտոնանկության հավանականության մասին ՝լ ասաց՝ չի լսել նման բան, բայց եթե փոփոխություն է արձանագրվում, դա դեռ չի նշանակում, որ տվյալ պաշտոնյան թերագնահատվում է։
«Ո՞վ է ասել, որ եթե աշխատանքի փոփոխություն է լինում, թերագնահատվում է մարդը։ Ես չեմ լսել, որ փոխեն իրեն, բայց որ երիտասարդները ավելի լավ են աշխատում․․․ ո՞նց եք գտնում Դուք»։