Եթե հավատանք Եվրահանձնաժողովին, Էգեյան ծովում ամեն ինչ շատ լավ է: Այս չորեքշաբթի ԵՄ-ի եւ Թուրքիայի միջեւ համաձայնագրի վերաբերյալ նոր թվեր են հրապարակվել, եւ միգրացիայի հարցերով հանձնակատար Դիմիտրիս Ավրամոպուլոսը խոսել է դրական կոնկրետ արդյունքների մասին, գրում է գերմանական Die Welt թերթը: Հանձնակատարի խոսքով, հունիսին «հունական կղզի է եկել օրական ընդամենը 85 միգրանտ» անցյալ տարվա հոկտեմբերի յոթ հազարի դիմաց:
Բայց իրականում հանձնաժողովը, ընդգծում է պարբերականը, «գործարքը եւ դրա հետեւանքները միայն իր համար դրական լույսի ներքո է ներկայացնում: Զարմանալի է եւ այն, թե ինչու սեպտեմբերի վերջին այն համեմատաբար հին տվյալներ է հրապարակում»: Իսկ հարցն այն է, որ հուլիսին եւ օգոստոսին փախստականների թիվն աճել է մինչեւ համապատասխանաբար 1920-ի եւ 3447-ի, իսկ այս ամիս այն էլ ավելի բարձր կլինի: Այդ ամենը նշանակում է, որ «գործարքն ի սկզբանե գործում էր, բայց այժմ արդեն ոչ», ընդգծում է թերթը, հայտնում է «Ինոպրեսսան»:
Այսպես, Թուրքիայի եւ Եվրամիության միջեւ համաձայնագրի գաղափարախոս Հերալդ Կնաուսը փախստականների վերաբերյալ գործող համաձայնագրի տապալում է կանխատեսում միգրանտների աճող թվի եւ հունական իշխանությունների` փախստականներին կղզիներից մայրցամաք տեղափոխելու որոշման ֆոնին: «Եթե ի վերջո միգրանտներին Թուրքիա վերադարձնելու փորձը չհաջողվի, Եվրամիության եւ Թուրքիայի միջեւ համաձայնագրին տապալում է սպասում», - Die Welt-ի հետ զրույցում հայտնել է Կնաուսը:
Կնաուսը Էգեյան ծովով «անցումների» աճող թիվը բացատրում է ռիսկերին փոփոխված մոտեցմամբ: «Միգրանտներին Էգեյան ծովում պահում էր անհուսության զգացումը: Նրանք կարծում էին, թե մյուս ափ անցնելուց հետո կհայտնվեն կամ հունական կղզիներում կամ էլ դարձյալ Թուրքիայում: Իսկ այժմ հասկանում են, որ Հունաստանում մնալու կամ էլ որոշ դանդաղումով դեպի հյուսիս տեղաշարժվելու իրենց շանսերն այնուամենայնիվ փոքր չեն»:
