Հրազդանում ծնողների աչքի առջեւ 7-ամյա տղային մահացու վրաերթի ենթարկելու մեջ մեղադրվող Վանիկ Սարգսյանը, որին դանակահարել էր մահացած երեխայի հայրը, դուրս է գրվել հիվանդանոցից:
NEWS.am-ի թղթակցի հետ զրույցում Սարգսյանի պաշտպան Վահե Դանիելյանը հայտնեց, որ իր պաշտպանյալն այժմ բուժումը տնային պայմաններում է շարունակում:
Նշենք, որ երեխայի վրաերթի ենթարկելու գործով առաջին դատական նիստը պետք է կայանար սեպտեմբերի 8-ին, սակայն այն հետաձգվել էր, քանի որ ամբաստանյալը հիվանդանոցում էր: Հաջորդ դատական նիստը նշանակված է հոկտեմբերի 3-ին:
«Բժիշկը դեռ չի որոշել՝ Վանիկ Սարգսյանը կկարողանա դատական նիստին մասնակցել, թե ոչ»,- ասաց փաստաբանը:
Հիշեցնենք, որ վրաերթը տեղի էր ունեցել 2016թ. հուլիսի 4-ին՝ ժամը 20:00-ի սահմանում: Հրազդանի բնակիչ 38-ամյա Վանիկ Սարգսյանի վարած «Վազ 2104» մակնիշի ավտոմեքենան քաղաքում դուրս էր եկել երթեւեկելի մասից եւ մայթին վրաերթի ենթարկել հետիոտն, 7-ամյա Արմեն Խամփերյանին, որը տեղում մահացել էր: Հարուցվել էր քրգործ` ՀՀ քրեական օրենսգրքի 242-րդ հոդվածի 2-րդ մասի հատկանիշներով: Վարորդը եղել է ոչ սթափ վիճակում: Վանիկ Սարգսյանը կալանավորվել էր, ապա գրավի դիմաց ազատ արձակվել: