Պլազմայի ռեակտորի ներսում մոնիտորինգի համար հայկական սարքը փորձարկել ու ձեռք է բերել Samsung կորպորացիայի դուստր ընկերություններից մեկը։ Այս մասին NEWS.am–ի թղթակցին հայտնել է Հայաստանի գիտությունների ակադեմիայի Ռադիոֆիզիկայի ու էլեկտրոնիկայի ինստիտուտի լաբորատորիայի վարիչ Տիգրան Զաքարյանը Երեւանում անցնող DigiTec Expo 2016 տեխնոլոգիական ցուցահանդեսի ժամանակ։
Սարքը ստեղծվել է պլազմայի ռեակտորի մեջ փոփոխական մագնիսային դաշտի մոնիտորինգի համար։ Այն թույլ է տալիս տեսնել դաշտի վիճակը ռեակտորի ներսում ու հետեւել՝ արդյոք այն բավականաչափ համասեռ է։
Հենց 2 նման սարք էլ գնել ու իր մոտ փորձարկել է Semes-ը՝ Samsung-ի դուստր ընկերությունը։ «Այդ ընկերությունը պլազմայի ռեակտորների խոշոր արտադրող է ու ինքն էլ լայնորեն գործածում է այն իր տեխնոլոգիաներում»,- պարզաբանել է Զաքարյանը։
Նրա խոսքով ինստիտուտը մտադիր է իր տեխնոլոգիան նորից ցուցադրել Կորեայում
«Semes-ը մեզ գովասանական արձագանք է ուղարկել, բայց դեռ հավելյալ սարքեր չի գնում; Ամեն տարի փետրվարին Սեուլում անցնում է կիսահաղորդիչ տեխնոլոգիաների ցուցահանդես։ Ուզում ենք այնտեղ ցուցադրել մեր տեխնոլոգիան ու հույս ունենք, որ դրանով կհետաքրքրվեն նաեւ ուրիշները»,- հավելել է գիտնականը։