Հայաստանում կբացվի Ռուսաստանի սահմաններից դուրս գտնվող Տիեզերական կոմպետենցիայի առաջին կենտրոնը։ Այս մասին NEWS.am-ի թղթակցին ասել է «Ռոսկոսմոս» ռուսական պետական կորպորացիայի մեքենաշինության կենտրոնական ԳՀԻ –ի առաջատար գիտաշխատող Վիկտոր Կրիվոպուսկովը։
Կենտրոնը ծրագրում են տեղակայել ԱԻՆ-ում, իսկ դրա օգնությամբ ստացվող արբանյակային տվյալները կիրառել անշարժ գույքի կադաստրում, օդերեւութաբանության ոլորտում (գյուղատնտեսությանն օգնելու համար), արտակարգ իրավիճակների դեմ։
Նույնպիսի կենտրոն էլ ծրագրում են բացել Հայաստանի Կրթության նախարարությունում, որպեսզի տիեզերական դիտարկումների օգնությամբ ստացված գիտելիքները (բնական գիտությունների ոլորտում եւ ոչ միայն) հասանելի դառնան դպրոցներին ու բուհերին, հավելեց Կրիվոպուսկովը։
«Այդ տեխնոլոգիաները արդեն գործում են Ռուսաստանում։ Հիմա մեր խնդիրն է Հայաստանը հաջող օրինակ դարձնել դրանց կիրառման համար»,- նկատել է Կրիվոպուսկովը։
Այդ նույն տեխնոլոգիաներն են ներկայացվելու հոկտեմբերի 14-ին, երբ Հայաստանում կկայանա ՀԱՊԿ Ակադեմիայի բացումը։
«Երբ այստեղ սովորեն այլ երկրներից կուրսանտներ, նրանք իրենց հետ կտանեն Հայաստանում ստացած գիտելիքներ ու տեխնոլոգիաներ։ Այդ գիտելիքները կդառնան նրանց ապագա աշխատանքի հիմքերից մեկը»,- նկատել է Կրիվոպուսկովը։
