«Սասնա ծռեր» խմբի անդամ Թաթուլ Թամրազյանը, որը հուլիսի 17-ին ոստիկանության ՊՊԾ գունդը գրոհելու ընթացքում տեղի ունեցած փոխհրաձգության ժամանակ ծանր վիրավորվել էր,արդեն կարողանում է ինքնուրույն տեղաշարժվել: NEWS.am-ի հետ զրույցում նրա պաշտպան Մոնիկա Մարգարյանը նշեց, որ «Դատապարտյալների հիվանդանոց» ՔԿՀ-ում գտնվող իր պաշտպանյալը հիմնականում պառկած վիճակում է լինում, նրա շարժումները դեռ սահմանափակ են, սակայն, ակնհայտ դրական տեղաշարժ է նկատվում նրա վիճակում:
Պաշտպանի խոսքով՝ Թաթուլ Թամրազյանը 2-3 ամիս անց կրկին վիրահատության կենթարկվի:
26-ամյա Թաթուլ Թամրազյանին մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) եւ 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը), 218-րդ հոդվածով՝ (պատանդ վերցնելը):
Ավելի վաղ տեղեկացրել էինք, որ ոստիկանության ՊՊԾ գնդի վրա կատարված հարձակման հետեւանքով վիրավորված «Սասնա ծռեր» ջոկատի անդամ 26-ամյա Թաթուլ Թամրազյանի ձախ երիկամը հեռացրել են:
