Առաջիկայում աջակցություն են ստանալու միայն այն ֆերմերները, ովքեր կհետեւեն ագրոկանոնների արդի պահանջներին: Այս մասին, սեպտեմբերի 30-ին, Իվանյան եւ Ասկերան համայնքներ այցելության ժամանակ նշել է Արցախի Հանրապետության վարչապետ Արայիկ Հարությունյանը:
ԼՂՀ կառավարությունից հայտնում են, որ վարչապետը մասնակցել է նորակառույց ջերմոցների բացման արարողությանը եւ խորհրդակցություն ունենալով շրջանի համայնքապետների ու խոշոր ֆերմերների հետ:
Ա. Հարությունյանը, Իվանյան համայնքում մասնակցելով «Արտ-Ռիտ» ՍՊ ընկերության կողմիցհիմնադրած նորակառույց ջերմոցների բացման արարողությանը, կարեւորել է ջերմոցային տնտեսությունների դերը հանրապետության գյուղատնտեսության զարգացման գործում եւ ընդգծել, որ հատկապես խրախուսելի է, որ ընկերության կողմից մեծ ուշադրություն է դարձվել նորագույն տեխնոլոգիաների կիրառման վրա:
Գործադիր իշխանության ղեկավարն այցելել է նաեւ Իվանյան համայնքում գրեթե շահագործման պատրաստ գինու նոր գործարան եւ, ներդրողների ուղեկցությամբ, ծանոթացել դրա արտադրական հնարավորություններին:
Այնուհետեւ Արայիկ Հարությունյանը ուղեւորվել է Ասկերան շրջկենտրոն, որտեղ հանդիպել է շրջանի համայնքապետների եւ խոշոր հողագործների հետ՝ քննարկելու գյուղատնտեսության հայեցակարգի հետ կապված մի շարք հարցեր: Վարչապետը նշել է, որ հարցի կապակցությամբ արդեն քննարկումներ են եղել կառավարությունում եւ Մարտունու շրջանում: Նրա խոսքով՝ այդ ձեւաչափով հանդիպումները շարունակվելու են նաեւ հանրապետության մյուս շրջաններում:
«Բացի գիտական ու փորձագիտական շրջանակների ընդգրկումից, հայեցակարգի մշակման գործում առանձնահատուկ դեր ունեն նաեւ հանրային այսօրինակ բաց քննարկումները: Այս կարեւոր նախաձեռնությունը ոլորտի հետագա զարգացման համար կառավարության կողմից իրականացվող պետական քաղաքականության կողմնորոշիչ փաստաթուղթն է լինելու առաջիկա տասնամյակներին»,-ասել է վարչապետը եւ ներկաներին կոչ արել առաջարկների տեսքով ակտիվորեն ներգրավվել հայեցակարգի մշակման աշխատանքներում:
Ա. Հարությունյանը հանդիպման մասնակիցներին հանգամանալից ներկայացրել է ընդունվելիք հայեցակարգի վերաբերյալ իր մոտեցումները՝ առանձին-առանձին անդրադառնալով հողագործության, այգեգործության, անասնաբուծության եւ մեղվաբուծության ոլորտներին: Նա նշել է, որ պետք է փոխվեն եղած մոտեցումները, եւ գյուղատնտեսությամբ զբաղվեն միայն համապատասխան գիտելիքներ ու հմտություններ ունեցող անձինք:
«Փոխվելու են նաեւ կառավարության մոտեցումները, եւ առաջիկայում աջակցություն են ստանալու միայն այն ֆերմերները, ովքեր կհետեւեն ագրոկանոնների արդի պահանջներին: Այլապես, չնայած մեր ունեցած գյուղատնտեսական մեծ ներուժին, մենք շարունակելու ենք շուկայում անմրցունակ եւ ցածր բերքատվությամբ մթերքներ արտադրել»,- շեշտադրել է վարչապետը:
Ակտիվ քննարկման պայմաններում ներկաները հնչեցրել են որոշ հարցեր ու առաջարկներ եւ վարչապետից ստացել սպառիչ պատասխաններ: Գործադիր մարմնի ղեկավարը նաեւ հանձնարարականներ է տվել պատասխանատու մարմինների ղեկավարներին՝ բարձրացված մի շարք խնդիրների լուծման ուղղությամբ:
