Սիսիանի դպրոցականներն ու ուսանողներն ուզում են ինքնուրույն մշակել անօդաչու սարքեր։

NEWS.am-ի թղթակցին Սիսիանի SarsUp տեխնոլոգիական կենտրոնի ներկայացուցիչ Հայկ Երանոսյանը հայտնել է, որ Սիսիանում արդեն դասընթացներ են կազմակերպել Տեղեկատվական ու հեռահաղորդակցության տեխնոլոգիաներում գերազանցության հայ- հնդկական կենտրոնի մասնագետները։ Նրանք տեղում պատրաստել են հրահանգիչների ուսումնական ինժեներական լաբորատորիաների համար։

Զգալով նոր գիտելիքների համը՝ հիմա էնտուզիաստները ուզում են իրենց ձեռքերով անօդաչու սարքեր հավաքել, որոնք սովորականից բարձր արագություն կունենան։ Այդ խնդրի վրա աշխատելու են փոքրից մեծ՝ կենտրոնում հավաքվում են տեխնիկայի ցանկացած տարիքի սիրահարներ՝ դպրոցականներից սկսած մինչեւ 40 տարեկան։

«Մեզ աջակցել են Instigate եւ National Instruments ընկերությունները։ Մենք ունենք 3D փրինթեր, որի վրա ինքներս ենք ստեղծել անօդաչուի կարկասը։ Ուզում ենք ինքնուրույն մտածել ու աշխատել։ Ուզում ենք փորձել, ինտերնետում որոնել, մոդելավորել։ Ուզում ենք, որ կողքից օգնությունը հնարավորինս քիչ լինի»,- ասում է Երանոսյանը։

Իրենց ձեռքերով ստեղծված առաջին անօդաչուն սիսիանցիները ցուցադրել են Երեւանում անցնող DigiTec Expo 2016 տեխնոլոգիական ցուցահանդեսին։