«Իսլամական պետություն» ահաբեկչական խմբավորման գրոհայինները փակել են Իրաքի Մոսուլ քաղաքում բոլոր ֆոտոստուդիաները, հայտնում է As Sumaria-ն:
Նինվեի նահանգում հեռուստաընկերության աղբյուրը հայտնել է, որ ԻՊ ինքնահռչակ մայրաքաղաքում ֆոտոստուդիաների արգելքը սահմանվել է մինչեւ հետագա ծանուցումը: Որոշումը հիմնավորող ոչ մի պատճառ չի ներկայացվել:
Բացի այդ, հայտնի է նաեւ, որ խմբավորման պարագլուխները արգելել են գրոհայիններին լուսանկարներ անել՝ անկախ հանգամանքներից: Հեռուստաընկերության աղբյուրները հայտնում են, որ վերջին ժամանակներս ԻՊ-ը հակասական հրահանգներ է տալիս, որոնք պայմանավորված են ներքին անվտանգությունն ապահովելու անհրաժեշտությամբ, որի կարիքը կա Իրաքի իշխանությունների կողմից Մոսուլի ազատագրման գործողությունը սկսելու ֆոնին:
