Վիկտոր Դալլաքյանը հրաժարական է ներկայացրել ՀՀ նախագահի աշխատակազմի ղեկավարի տեղակալի, ԱԺ-ում ՀՀ նախագահի մշտական ներկայացուցչի պաշտոններից եւ պատրաստվում է դուրս գալ ՀՀԿ-ի կազմից: Այս մասին նա հայտարարել է այսօր՝ հոկտեմբերի 11-ին, լրագրողների հետ հանդիպման ժամանակ:
Վիկտոր Դալլաքյանը մասնավորապես, հայտարարել է.
«Ես հայտարարում եմ, որ հրաժարական եմ ներկայացրել ՀՀ նախագահի աշխաըակազմի ղեկավարի տեղակալի եւ ԱԺ-ում ՀՀ նախագահի մշտական ներկայացուցչի պաշտոնից:
Երկրորդ՝ հայտարարում եմ, որ դուրս եմ գալիս ՀՀԿ-ից, երրորդ՝ ես հայտարարում եմ, որ այսուհետեւ վերադառնում եմ ակտիվ քաղաքականություն եւ ակտիվորեն մասնակցելու եմ 2017-ի խորհրդարանական ընտրություններին: Համապատասխան ձեւաչափի մասին ես լրացուցիչ ձեզ կտեղեկացնեմ:
Չորրորդ՝ ես հայտարարում եմ, որ այսօրվա իմ ելույթից հետո եթե ինձ կամ իմ ընտանիքի անդամներին որեւէ բան պատահի, ապա դրա պատասխանատուն Սերժ Սարգսյանն է:
Նաեւ դիմում եմ ՀՀ-ում հավատարմագրված դեսպաններին, որպեսզի նրանք հնարավորության դեպքում ուշադրություն դարձնեն իմ հայտարարություններին:
Նշենք, որ Վիկտոր Դալլաքյանն ասուլիսն սկսել է 2012 թվականի ընտրությունների հիշատակմամբ, որտեղ պարտվել է ԱԺ պատգամավոր Էդմոն Մարուքյանին:
Ավելի վաղ լրատվամիջոցներով տեղեկություններ էին տարածվել, որ Վիկտոր Դալլաքյանը պատրաստվում է կուսակցություն ստեղծել «Շրջադարձ» անունով: Նշվում էր նաեւ, որ այդ կուսակցությունում կլինի նաեւ պաշտպանության նախկին նախարար Սեյրան Օհանյանը: