Հայաստանի հետ «Ռոսօբորոնէքսպորտ» ԲԸ-ն լավ հարաբերություններ ունի: Հայաստանում ArmHiTec–2016 սպառազինության առաջին ցուցահանդեսի բացման ժամանակ լրագրողների հետ զրույցում այս մասին հայտարարել է «Ռոսօբորոնէքսպորտ» ԲԸ-ի տարածաշրջանային դեպարտամենտի պետի տեղակալ, «Ռոստեքս» պետական ընկերության եւ «Ռոսօբորոնէքսպորտ» ԲԸ-ի միացյալ պատվիրակության ղեկավար Վլադիմիր Գոնչարովը: Ցուցահանդեսը կտեւի մինչեւ հոկտեմբերի 15-ը:
«Մենք աշխատում ենք աշխարհի ավելի քան 80 երկրների հետ, այդ թվում՝ ՀԱՊԿ եւ ԱՊՀ երկրների: Աշխատում ենք նաեւ Հայաստանի հետ: Մենք լավ հարաբերություններ ունենք»,- մեկնաբանել է Վլադիմիր Գոնչարովը: Սակայն Հայստանի հետաքրքրությունների վերաբերյալ հարցին հրաժարվել է պատասխանել: «Թե ինչ տեխնիկայի հանդեպ է Հայաստանը հետաքրքրություն դրսեւորում հարցը ավելի լավ է Հայաստանի պաշտպանության նախարարության ներկայացուցիչներին տալ»,- նշել է «Ռոսօբորոնէքսպորտ»-ի ներկայացուցիչը:
Նշենք, որ ցուցահանդեսին մասնակցում են 50-ից ավելի ձեռնարկություններ: Ցուցահանդեսում Ռուսաստանը ներկայացնում են 16 ձեռնարկություններ: Ներկայացված նմուշների թվում են՝ բազմանպատակային նշանակության «Տիգր-Մ», «Թայֆուն-Կ» ավտոմեքենաները, հրաձգային զենք, «Տոր-Մ2ԿՄ» զենիթահրթիռային համալիրը, «Պանցիր» զենիթահրթիռային հրանոթային համալիրը, հետեւակի ռազմական «3Ֆ» մեքենան, «82Ա» զրահամեքենան, «ՄիԳ-35» ինքնաթիռը, «ՄԻ-171Շ» ուղղաթիռը: