Վարչապետ Կարեն Կարապետյանն ընդունել է Բրազիլիայի Դաշնային Հանրապետության գյուղատնտեսության, անասնապահության եւ մատակարարման նախարարի տեղակալ Էումար Նովացկիի գլխավորած պատվիրակությանը:
Վարչապետը ողջունել է պարոն Նովացկիի այցը մեր երկիր եւ հույս հայտնել, որ այն կնպաստի հայ-բրազիլական տնտեսական կապերի հետագա զարգացմանն ու ընդլայնմանը: Կարեն Կարապետյանը կարեւորել է գյուղատնտեսության ոլորտում երկու երկրների միջեւ կապերի խորացումը, փորձի փոխանակումը, համատեղ ծրագրերի իրականացումը, ինչին կնպաստի նաեւ 2016 թվականի օգոստոսին երկու երկրների գյուղատնտեսության նախարարությունների միջեւ ստորագրված «Գյուղատնտեսության բնագավառում համագործակցության մասին» փոխըմբռնման հուշագիրը: Վարչապետն ընդգծել է, որ գյուղատնտեսության ոլորտը կառավարության համար ունի չափազանց կարեւոր նշանակություն, եւ առաջիկայում գործադիրն առաջարկելու է այս բնագավառի զարգացմանը միտված նոր մեխանիզմներ: «Մենք բաց ենք համագործակցության համար եւ պատրաստ համատեղ ներդրումային ծրագրերի իրականացմանը, ինչպես նաեւ բրազիլական կապիտալի՝ Հայաստան ներհոսքին»,- ասել է Կարեն Կարապետյանը:
Էումար Նովացկին նշել է, որ իր երկիրը շահագրգռված է Հայաստանի հետ ներդրումային ծրագրերի իրականացմամբ, ինչպես նաեւ երկկողմ առեւտրաշրջանառության ծավալների ավելացմամբ: