ՆԱՏՕ-ն չի կարող մեկուսացնել Ռուսաստանին եւ նույնիսկ դա անելու փորձեր չպետք է ձեռնարկի: Սակայն Դաշինքը պետք է ուժեղացնի պաշտպանությունը՝ Մոսկվայի հետ հնարավոր կոնֆլիկտից խուսափելու համար: RT-ի հաղորդմամբ՝ այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը:
«Մենք «սառը պատերազմի» մեջ չենք, բայց նաեւ չկա այն գործընկերությունը, որի ուղղությամբ աշխատել ենք տարիներ շարունակ: Մոսկվայի հետ այժմյան հարաբերությունների նման կապեր նախկինում չեն եղել»,- իտալական La Stampa-ին տված հարցազրույցում ասել է Ստոլտենբերգը:
Նրա խոսքով՝ ՆԱՏՕ-ն պետք է հարմարվի մարտահրավերներին եւ պատասխանի դրանց: «Դաշինքի կարգախոսն է՝ «պաշտպանություն եւ երկխոսություն», այլ ոչ թե «պաշտպանություն կամ երկխոսություն»: Քանի դեռ ՆԱՏՕ-ն հետեւողականորեն պահպանում է ընտրված ուղեգիծը, հնարավոր կլինի շարունակել Ռուսաստանի՝ մեր գլխավոր հարեւանի հետ երկխոսությունը: Մենք չենք կարող որեւէ կերպ մեկուսացնել նրան: Մենք նույնիսկ չպետք է փորձենք»,- ասել է գլխավոր քարտուղարը:
